1263
STRUGA, DEMIRGAZYK MAKEDONIÝA – 2025-nji ýylyň 24-29-njy iýun aralygynda Demirgazyk Makedoniýanyň Struga şäherinde geçirilen Ýaşlaryň 29-njy Balkan matematika olimpiadasynda Türkmenistanyň zehinli mekdep okuwçylary üstünlikli çykyş edip, ýurdumyzyň halkara abraýyny has-da belende galdyrdylar.
Bu abraýly bäsleşige dünýäniň 23 döwletinden jemi 135 okuwçy gatnaşdy. Azerbaýjan, Rumyniýa, Saud Arabystan, Fransiýa, Türkiýe, Gruziýa, Gazagystan, Özbegistan ýaly ýurtlaryň wekilleriniň gatnaşmagynda geçirilen olimpiadada türkmenistanly ýaşlaryň üstünlikli çykyş etmegi aýratyn bellenilmäge mynasypdyr.
Türkmenistanyň adyndan olimpiadada Aşgabat şäherindäki ýöriteleşdirilen orta mekdepleriň 6 okuwçysy gatnaşdy. Okuwçylaryň taýýarlykly toparyna Arkadag şäheriniň iňlis dili dersine ýöriteleşdirilen 3-nji orta mekdebiniň matematika mugallymy Arslan Hojiýew hem-de Aşgabat şäheriniň 87-nji ýöriteleşdirilen orta mekdebiniň matematika mugallymy Gurbanmyrat Jelaletdinow ýolbaşçylyk etdiler.
Netijede, ýurdumyzyň wekilleri 1 altyn, 4 kümüş we 1 bürünç medala eýe boldular:
| T/b | Familiýasy we ady | Synpy | Mekdebi | Medaly |
|---|---|---|---|---|
| 1 | Gurbanow Hemra | 9 | Aşgabat şäheri, 86-njy mekdep | Altyn medal |
| 2 | Akmyradow Atabaý | 9 | Aşgabat şäheri, 86-njy mekdep | Kümüş medal |
| 3 | Akmämmedow Ýeňiş | 9 | Aşgabat şäheri, 86-njy mekdep | Kümüş medal |
| 4 | Resulow Ýusup | 9 | Aşgabat şäheri, 87-nji mekdep | Kümüş medal |
| 5 | Ojarow Parahat | 9 | Aşgabat şäheri, 87-nji mekdep | Kümüş medal |
| 6 | Döwranow Omar | 9 | Aşgabat şäheri, 83-nji mekdep | Bürünç medal |
Balkan ýurtlarynyň ýaşlarynyň arasynda geçen bu ýokary derejeli matematika bäsleşiginde türkmen okuwçylarynyň gazanan üstünlikleri ýurdumyzyň bilim ulgamynda alnyp barylýan döwlet syýasatynyň üstünlikli miwesidir.
Toparyň ýolbaşçylarynyň biri, Arkadag şäheriniň 3-nji orta mekdebiniň mugallymy Arslan Hojiýew şeýle belledi:
“Gahryman Arkadagymyzyň we Arkadagly Gahryman Serdarymyzyň taýsyz tagallalarynyň netijesinde döredilen mümkinçilikler ýaş nesliň halkara derejesindäki bäsleşiklere ýokary taýýarlyk bilen gatnaşmagyna giň ýol açýar. Hormatly Prezidentimiziň ýaşlara bildirýän uly ynamy biz mugallymlara-da täze höwes berýär.”
Olimpiada gatnaşyjy ýaşlaryň bu üstünlikleri diňe bir medallar bilen däl, eýsem bilim ulgamyndaky halkara hyzmatdaşlygyň, ýaş nesliň zehininiň ösdürilmeginiň aýdyň mysaly hökmünde hem uly ähmiýete eýedir.
Türkmenistanyň ýaşlary halkara giňişlikde üstünlikli çykyş etmekde dowam edip, ýurdumyzyň baýdagyny belentden parladýarlar.
62115
53646
25394
21963
19907
79
53
79
74
153
221
