Ýaňy ýakynda Bütindünýä şäherler gününde ÝUNESKO-nyň Baş direktory Odri Azuleniň çözgüdine görä Aşgabat şäheri ÝUNESKO-nyň döredijilik şäherleriniň toruna «Dizaýn» ugry boýunça resmi taýdan goşuldy. Bu barada Türkmenistanyň Daşary işler ministrliginiň resmi saýty habar berýär.

Bilşimiz ýaly, bu ugurdaky başlangyçlar 2021-nji ýylda başlanylyp, Türkmenistan tarapyndan ÝUNESKO-nyň düzüm birlikleri, komitetleri we halkara hünärmenleri bilen bilelikde degişli işler geçirildi. Aşgabat şäheri dünýä jemgyýetçiligi tarapyndan dünýäde owadan we tehnologiki taýdan ösen şäher hökmünde ykrar edildi. Bu ýyl ÝUNESKO-nyň döredijilik şäherleri toruna 55 sany täze şäher goşuldy. Iň soňky goşmaçalar bilen Tor häzirki wagtda ýedi döredijilik ugruna wekilçilik edýän ýüzden gowrak ýurtda Senetçilik we halk döredijiligi, Dizaýn, Film, Gastronomiýa, Edebiýat, Mediýa sungaty we Aýdym-saz ýaly ýedi döredijilik ugrundaky 350 şäheri öz içine alýar.

ÝUNESKO-nyň Baş direktory, guramanyň resmi metbugat synynda bu döredijilik şäherleri toruna girýän şäherleriň medeniýete elýeterliligi giňeltmekde we şäheriň durnuklylygyny we ösüşini üpjün etmek üçin döredijilik mümkinçiliklerinden peýdalanmakda öňdebaryjydygyny aýtdy.

Pena GURBANOW,
Türkmenistanyň Döwlet energetika institutynyň
Energo-tehnologiýa fakultetiniň talyby.