Ak bugdaý etrabynyň Änew şäherindäki «Çynar» toý mekanynda Täze ýyl baýramçlygyna bagyşlanan söz-söhbetli dabara geçirildi. Dabarany Ak bugdaý etrap häkimligi, Türkmenistanyň Demokratik partiýasynyň etrap komiteti, Türkmenistanyň Agrar partiýasynyň etrap komiteti, Türkmenistanyň Kärdeşler arkalaşyklarynyň etrap birleşmesi, Türkmenistanyň Magtymguly adyndaky Ýaşlar guramasynyň etrap Geňeşi hem-de etrabyň medeniýet bölümi bilelikde gurady.

Halk hojalygynyň dürli pudaklarynda zähmet çekýän öňdebaryjy ildeşlerimiziň, jemgyýetçilik guramalarynyň işgärleriniň we işjeň agzalarynyň, ýaşuly nesliň wekilleriniň gatnaşmagynda bolan dabarada Watanymyzyň bedew batly ösüşleri, durmuşymyzda bolup geçýän ajaýyp özgertmeler, tamamlanyp barýan ýylda dürli ugurlarda ýetilen sepgitler baradaky gürrüňleri diňlemek diýseň ýakymly boldy.

Toý saçagynyň başyna ýygnananlar etrabyň medeniýet we sungat işgärleriniň, höwesjeň ýaşlaryň baýramçylyk çykyşlaryny egsilmez ruhubelentlik bilen diňlediler. Ýaňlanan şirin owazly, belent mukamly aýdym-sazlar milli öwüşginli tanslar bilen özara sazlaşygy döredip, dabara gatnaşyjylaryň toý şatlygyny goşalandyrdy.