Ak bugdaý etrabynyň oba zähmetkeşleri ak ekine göwnejaý ideg etmek bilen bir hatarda galla oragyna hem ykjam taýýarlyk görýärler. Galla oragy möwsüminde daýhanyň esasy daýanjyna öwrüljek däne orujy kombaýnlaryň taýýarlygyna şu günlerden aýratyn ähmiýet berilýär.

Ak bugdaý etrabynyň tehniki hyzmat ediş kärhanasynda bar bolan ýokary öndürijilikli däne orujy kombaýnlaryň her biri gözden geçirilip, taýýarlyk hatarynda goýulýar. Bu babatda abatlaýjy ussalaryň alyp barýan işleri bellenmäge mynasypdyr. Möwsümde kombaýnlary tejribesi ýetik mehanizatorlara berkitmek maksat edinilýär. Şeýle mehanizatorlaryň arasynda ýaşlaryň hem bolmagy guwandyrýar.