“Türkmengaz” döwlet konserniniň “Türkmengazburawlaýyş” müdirliginiň burawçylary Mary welaýatyndaky Ýylan käninde ýerleşýän №03 belgili ulanyş-baha beriş guýusynda tebigy gazyň senagat taýdan ähmiýetli akymyny alyp, buraw işlerini üstünlikli tamamladylar. Türkmenistanyň nebitgaz pudagynyň elektron neşiriniň sişenbe güni habar bermegine görä, bu guýudan bir gije-gündizde 740 müň kubmetre çenli tebigy gaz alnyp bilner.

Guýynyň umumy çuňlugy 2875 metre ýetýär. Gazyň güýçli akymy 2844 — 2847 metr aralygyndaky önüm gatlagyndan alyndy. Burawçylaryň alyp baran çylşyrymly işleri netijesinde kükürtsiz, ýokary hil derejesindäki gaz çykaryldy.

Hünärmenleriň bellemegine görä, bu ýerde gaz çykaryşynyň dünýä ölçeglerine laýyk gelmegi onuň halkara bazarynda ykdysady taýdan bähbitli boljakdygyna esas döredýär.

Şeýle hem, ozal “Galkynyş” käninde bir gije-gündizde 2 million kubmetr gaz bermäge ukyply ýokary öndürijilikli guýy ulanylmaga tabşyryldy.