Ýurdumyzyň bilim ulgamynyň işgärleriniň wekiliýeti 25 — 28-nji oktýabr aralygynda Halkara uniwersitetler bileleşiginiň Irlandiýanyň Dublin şäherinde geçirilen XVI baş maslahatyna gatnaşdy.

Maslahata dünýäniň 90 çemesi döwletinden 300 töweregi wekil, şol sanda Türkmenistanyň Bilim ministrliginiň, Ýagşygeldi Kakaýew adyndaky Halkara nebit we gaz uniwersitetiniň, Oguz han adyndaky Inžener-tehnologiýalar uniwersitetiniň hem-de Halkara ynsanperwer ylymlary we ösüş uniwersitetiniň wekilleri gatnaşdylar. Maslahatyň işi umumy mejlisdäki çykyşlar, bölümçeler we «tegelek stoluň» başyndaky pikir alyşmalar görnüşinde alnyp baryldy. Umumy mejlisde bilim edaralarynyň jemgyýetdäki orny, geljekde ulgamda geçirilmeli özgertmeler dogrusyndaky meseleler ara alnyp maslahatlaşyldy.

Türkmen wekiliýetiniň agzalary maslahatyň çäklerinde Halkara uniwersitetler bileleşiginiň ýolbaşçylary we agzalary bilen ikitaraplaýyn duşuşyklary-da geçirdiler. Olarda bileleşigiň ýokary bilim pudagynda geçirýän özgertmelerinde gazanýan üstünlikleri, şeýle hem Türkmenistanyň ýokary okuw mekdepleriniň işini has-da kämilleşdirmek boýunça öňde duran wezipeler dogrusynda pikir alşyldy. Bileleşigiň Baş sekretarynyň orunbasary bilen geçirilen duşuşykda Türkmenistanyň ýokary okuw mekdepleriniň mugallymlarynyňdyr alymlarynyň ylmy işleriniň bu düzümiň žurnallarynda, esasan-da, «Scopus», «Web of Science» ýaly meşhur neşirlerinde çap edilmeginiň meseleleri ara alnyp maslahatlaşyldy.

Türkmenistanyň ýokary okuw mekdepleriniň wekilleri bileleşigiň agzasy bolan beýleki abraýly daşary ýurt uniwersitetleriniň wekilleri bilen hem özara duşuşyklary geçirdiler. Olaryň barşynda geljekde ýokary bilim edaralarynyň arasynda yzygiderli hyzmatdaşlygy, özara tejribe alyşmagy ýola goýmak boýunça maslahat edildi.

Ýurduň ýokary okuw mekdepleriniň wekilleriniň bu maslahata gatnaşmaklarynyň esasy maksatlarynyň biri-de Halkara uniwersitetler bileleşiginiň ýolbaşçylaryny we maslahata gatnaşyjylary Türkmenistanyň milli bilim ulgamynda durmuşa geçirilýän özgertmeler, ýokary okuw mekdeplerinde sanly ulgamyň ornaşdyrylyşy bilen tanyşdyrmakdan ybarat boldy.

ÝUNESKO-nyň goldawy esasynda Halkara uniwersitetler bileleşiginiň döredilenine şu ýyl 72 ýyl dolýar. Ol ýokary hünär bilim edaralaryny birleşdirýän gurama bolup, dünýäniň 130-a golaý ýurdundan 551 uniwersiteti, 31 guramany, 19 kärhanany we 10 birleşigi özünde jemleýär. Bileleşigiň sekretariaty Pariž şäherinde ýerleşýär we ol ýokary bilim ulgamyna degişli halkara çäreleri guramak bilen, bu ugurdaky meseleleri ara alyp maslahatlaşmak üçin oňaýly meýdançany emele getirýär.

Halkara uniwersitetler bileleşiginiň Irlandiýanyň Dublin şäherinde geçirilen XVI baş maslahatynyň esasy maksady ýokary bilimiň geljegini ara alyp maslahatlaşmakdan, uniwersitetleriň jemgyýetçilik ähmiýeti we orny boýunça pikir alyşmakdan ybarat boldy.

Resul ÝAZYROW,

Döwletmämmet Azady adyndaky
Türkmen milli dünýä dilleri
institutynyň mugallymy.