Ýakynda Änew şäherindäki Medeniýet öýünde N.Saryýew adyndaky welaýat çagalar sungat mekdebiniň 2019 — 2020-nji okuw ýylynyň jemlerine bagyşlanan hasabat konserti boldy.   Ýaş nesliň ajaýyp sungat baýramçylygyna öwrülen konserte mekdebiň mugallymlarydyr okuwçylaryndan başga-da, ýaş zehinleriň ene-atalary, dogan-garyndaşlary, sungatyň köpsanly muşdaklary gatnaşdy.

         Myhmanlar, ilki bilen, medeni ojagyň giň eýwanynda guralan surat sergisi bilen tanyşdylar. Çagalar sungat mekdebiniň okuwçylarynyň işleriniň bu ýerdäki sergisi temasynyň giňdigi bilen uly gyzyklanma döretdi. Soňra esasy sahnada sungatyň ýaş zehinleriniň çykyşlary ýaýbaňlandyryldy. Çagalar sungat mekdebiniň orkestr toparynyň Nury Saryýewiň döreden “Torgaý guşlar” sazyny ussatlarça ýerine ýetirmekleri bilen başlanan aýdym-sazly çykyşlar göwün göteriji duýgulary peşgeş berdi.  Konsertiň dowamynda mekdebiň aýdym-saz, halk döredijilik toparlarynyň ýerine ýetirmegklerinde ýaňlanan  ýaş  zehinleriň sungat başarnygyny aýdyň ýüze çykardy.