«Ýandeks» kompaniýasy ulanyjylara aýdym-saz saýlamakda kömek edýän Sona atly täze nesil generatiw neýrotoryny tanyşdyrdy. Öňki ulgamlardan tapawutlylykda, täze model aýdym-saz gözleginden başlap, diňleýjiniň isleglerine laýyk kompozisiýalary saýlamaga çenli ähli işleri bitewi ulgam arkaly ýerine ýetirýär.

Sona tehnologiýasynyň esasy aýratynlygy aýdym-saz eserlerini gözlemek we toparlara bölmek işlerini bir akylly ulgamda birleşdirmegidir. Model aýdymlaryň ses aýratynlyklaryny we diňleýjileriň isleglerini seljerip, her bir esere sanly kod berýär. Ulanyjylaryň diňleýiş taryhy, aýdymlary geçirmegi we olara beren bahalary esasynda algoritm millionlarça kompozisiýanyň arasyndan iň laýyk eserleri saýlaýar.

Täze tehnologiýa «Alisa» ses kömekçisi bilen işleýän akylly kolonkada synagdan geçirildi. Synaglaryň netijesinde öňki köp basgançakly maslahat beriş ulgamy bilen deňeşdirilende birnäçe oňyn görkeziji hasaba alyndy. Ulanyjylaryň aýdym diňlemek üçin sarp edýän wagty 6,3 göterim, oňyn bahalaryň sany 11,4 göterim, hyzmatyň işjeň ulanyjylarynyň sany bolsa 4,5 göterim ýokarlandy.

«Ýandeks» kompaniýasynyň hünärmenleri Sona modelini mundan beýläk-de synagdan geçirip, onuň mümkinçiliklerini kämilleşdirmegi dowam etdirýärler. Geljekde bu tehnologiýany haryt maslahatlaryny hödürlemekde, mahabat platformalarynda we kompaniýanyň beýleki sanly hyzmatlarynda ulanmak meýilleşdirilýär.

Döwran AKMYRADOW,
Türkmen oba hojalyk institutynyň 1-nji ýyl talyby.