Häzirki wagtda daşary ýurt dillerini öwrenmek möhüm şerte öwrüldi. Dil öwrenmekde girizilen ençeme usullar bolup, her bir adam ony dürlüçe peýdalanýar. Eýsem, ukyda wagtyň dil öwrenip bolarmy? Elbetde häzirlikçe bu barada anyk kesgitleme ýa-da subutnama ýok. Ýöne bu usulyň asyl manysy öwrenen zatlaryň ukyda berkidilýändigi bilen baglanyşykly bolup durýar. Haçanda islendik daşary ýurt dillerini ýa-da haýsy-da bolsa bir zady uklamazdan öň öwrensek, onda öwrenen täze sözlerimiz, maglumatlarymyz beýnimizde uzak wagtlaýyn galmagyna şert döreýär. Emma islendik bir zady öwrenenimizden soňra başga hereketleri ýerine ýetirip fiziki işjeňlikde bolsak, öwrenen maglumatlarymyzyň beýnimizde galmak ähtimallygy hem belli bir derejede peselýär. Bu ýagdaý alymlar tarapyndan ýörite tejribeler, gözegçilikler arkaly subut edilen.

Häzirki wagtda kämil tehnologiýalaryň durmuşymyza çalt depginde ornaşmagy bilen daşary ýurt dillerini öwrenmeklige bolan zerurlyk hem belli bir derejede artýar. Çünki dil öwrenmeklik dünýä çykmagyň baş şerti hasaplanylýar. Bu ugurda ýaşlary dil öwrenmeklige höweslendirmek ýa-da zerur şertleri döretmeklik möhüm görkezijidir. Ýeterlik derejede döredilen şertler, höweslendirmeler bolsa ýaş nesilleri daşary ýurt dillerini öwrenmeklige ruhlandyrýar. 

Hudaýberdi ALLAKULYÝEW,

Türkmenistanyň Döwlet energetika
institutynyň2-nji ýyl talyby.