Berkarar döwletiň täze eýýamynyň Galkynyşy döwründe eziz Watanymyz belent ösüşleriň, döredijilikli zähmetiň we halkara abraýyň täze sepgitlerine ynamly gadam basýar. Türkmenistanyň Mejlisiniň karary bilen 2026-njy ýylyň «Garaşsyz, baky Bitarap Türkmenistan — bedew batly at-myradyň mekany» ýyly diýlip yglan edilmegi ýurdumyzyň taryhynda möhüm ähmiýetli waka boldy. Bu şygar halkymyzyň asyrlardan gözbaş alýan milli gymmatlyklaryny, Garaşsyz döwletimiziň kuwwatyny hem-de geljege bolan beýik ynamyny özünde jemleýär. 

Şygaryň ilkinji bölegi bolan «Garaşsyz, baky Bitarap Türkmenistan» diýen jümle döwletimiziň dünýä bileleşigindäki ýokary abraýyny aýdyň görkezýär. Garaşsyzlyk türkmen halkynyň iň beýik gymmatlygy bolup, baky Bitaraplyk bolsa ýurdumyzyň parahatçylyk söýüjilikli daşary syýasatynyň binýadydyr. Türkmenistan häzirki döwürde halkara hyzmatdaşlygy ösdürmekde, dostluk we ynanyşmak gatnaşyklaryny pugtalandyrmakda nusgalyk ýurtlaryň biri hökmünde giňden ykrar edilýär.

«Bedew batly at-myradyň mekany» diýen çuň manyly söz düzümi milli buýsanjymyz bolan ahalteke bedewleriniň belent şöhratyny wasp edýär. Türkmen halky gadymy döwürlerden bäri bedewi wepaly dost, üstünlikleriň hem-de rowaçlygyň nyşany hökmünde sarpalap gelipdir. «At — myrat» diýen parasatly jümle hem halkymyzyň durmuş pelsepesinde aýratyn orun eýeleýär. Bedewiň çaltlygy, gözelligi we çydamlylygy häzirki döwürde ýurdumyzyň ösüşleriniň badyny alamatlandyrýar.

2026-njy ýylyň şygarynyň aýratyn ähmiýeti, bu ýylda Türkmenistanyň mukaddes Garaşsyzlygynyň 35 ýyllygynyň giňden belleniljekdigindedir. Şanly sene mynasybetli geçiriljek çäreler halkymyzyň döwlet Garaşsyzlygyna bolan buýsanjyny has-da artdyrar. Ýurduň ähli künjeklerinde durmuşa geçirilýän iri taslamalar, täze binalar, önümçilik desgalary we medeni ojaklar ýurdumyzyň ykdysady kuwwatynyň yzygiderli ýokarlanýandygynyň aýdyň subutnamasydyr.

Ýylyň şygary ýaş nesli watançylyk, zähmetsöýerlik we milli gymmatlyklara hormat goýmak ruhunda terbiýelemekde hem möhüm ähmiýete eýedir. Bedew batly ösüşler bilimde, ylymda, sportda, medeniýetde we beýleki ugurlarda gazanylýan üstünliklerde öz beýanyny tapýar. Ýaşlar üçin döredilýän giň mümkinçilikler olaryň dünýä derejesinde bäsleşige ukyply hünärmenler bolup ýetişmegine ýardam berýär.

Şeýlelikde, «Garaşsyz, baky Bitarap Türkmenistan — bedew batly at-myradyň mekany» ýyly milli buýsanjymyzyň, döwlet kuwwatymyzyň we beýik geljegimiziň aýdyň beýanydyr. Bu şygar her bir raýaty täze zähmet üstünliklerine ruhlandyrýar, Watanymyzyň ösüşlerine goşant goşmaga çagyrýar. Bedew bady bilen öňe barýan eziz Türkmenistan mundan beýläk-de parahatçylygyň, dostlugyň we rowaçlygyň mekany hökmünde dünýäde öz abraýyny has-da belende göterer.

Näzik SARYÝEWA,

S.A.Nyýazow adyndaky Türkmen oba hojalyk
uniwersitetiniň mugallymy.