Türkmenistan ikinji emeli aragatnaşyk hemrasyny Äleme uçurmagy meýilleşdirýär. Bu barada «Türkmen hemrasy» ÝGPJ-niň direktory Batyr Orazdurdyýew «Türkmentel—2022» Halkara maslahatynyň dowamynda belläp geçdi.

Batyr Orazdurdyýew, bu taslamanyň durmuşa geçirilmeginiň «Türkmenistanyň Prezidentiniň ýurdumyzy 2022 — 2028-nji ýyllarda durmuş-ykdysady taýdan ösdürmegiň Maksatnamasyna» goşulandygyny aýdyp geçdi.

Ýeri gelende belläp geçsek, ilkinji aragatnaşyk hemrasy bolan «TürkmenÄlem 52°E» - 2015-nji ýylyň aprel aýynyň 27-ne 23 sagat 03 minutda, ABŞ-nyň Kanaweral burnundaky kosmodromdan «Falcon 9» amerikan raketasy bilen älem giňişligine uçuryldy. Onuň hyzmat möhleti 15 ýyl bolup durýar. Hemra, Türkmenistanyň buýurmasy boýunça fransuz kompaniýasy «Thales Alenia Space» tarapyndan öndürildi.