Türkmenistanda geçirilen «Ashgabat Open 2024» halkara tennis ýaryşy üstünlikli tamamlandy. Bu ýaryşda 14 ýaşdan kiçi türgenler gatnaşdy, olar 12 ýurtdan gelip, Aşgabadyň Olimpiýa şäherçesiniň Tennis toplumynda alty günüň dowamynda bäsleşdiler. Ýaryş Aziýanyň Tennis federasiýasy tarapyndan guraldy we ýekeleýin hem-de jübütleýin görnüşde geçirildi.

Ýaryşyň netijelerine görä, türkmen türgenleri umumy baýraklaryň sekizisini eýelediler. Olar ýekeleýin hem-de jübütleýin görnüşlerde üstünlik gazanyp, birinji we ikinji orunlara mynasyp boldular. Hususan-da, Nazar Amangeldiýew we Kerimgeldi Welibegow toparlaýyn ýaryşda ýeňiji bolup, Süleýman Hudaýberdiýew bilen Emirhan Rustamowy ýeňdiler. Gyzlaryň arasynda Ilima Guseýnowa bilen Aýlar Kakabaýewa hem jübütleýin ýaryşda öňdeligi eýelediler.

Ýaryş türkmen türgenleriniň ýokary taýýarlygyny we ýurdumyzda sporty ösdürmek ugrunda alnyp barylýan giň gerimli işleri ýene-de bir gezek tassyklady. Ýaryşyň ahyrynda Türkmenistanyň Döwlet senasy ýaňlandy we baýdaklar belende galdyryldy. Şeýle hem, ýeňijilere hormatly Prezidentimiziň adyndan gymmat bahaly sowgatlar gowşuryldy.

Ýaryşa gatnaşyjylar türkmen halkynyň taryhy we medeni mirasy bilen tanyşmak üçin ýörite medeni maksatnama arkaly baý tejribe gazandylar. Türkmenistanyň halkara sport merkezine öwrülmekde alyp barýan işleri halkara derejesinde ýokary baha mynasyp boldy.

Yhlas Şageldiýew,
Türkmen oba hojalyk instituty 
3-nji ýyl talyby.