Türkmen telekeçileri 2025-nji ýylyň 29–31-nji maýynda Iordaniýa Haşimit Patyşalygynda geçiriljek “Sawsana 2025” atly 11-nji halkara oba hojalyk sergisine gatnaşarlar. Bu çäre ýurduň Oba hojalyk ministrliginiň goldawy bilen guralýar diýip, Türkmenistanyň Senagatçylar we telekeçiler birleşmesi habar berýär.

Sergide iň täze tehnologiki işläp taýýarlamalar, oba hojalygynda, weterinariýada we azyk senagatynda ulanylýan häzirki zaman enjamlar hem-de usullar tanyşdyrylar.

Türkmen telekeçileri we önüm öndürijileri häzirki zaman oba hojalyk tehnologiýalary boýunça tejribe alyşmaga, öňdebaryjy halkara tejribeler bilen tanyşmaga, Iordaniýa we beýleki ýurtlardan hyzmatdaşlar bilen işewür gatnaşyklary ýola goýmaga hem-de halkara bazarda öz önümlerini görkezmäge mümkinçilik alarlar.

“Sawsana” sergisi ilkinji gezek 2003-nji ýylda Iordaniýa Haşimit Patyşalygynyň başlangyjy bilen geçirilipdi. Şondan bäri giň halkara goldawyna eýe bolan bu çäre, Iordaniýanyň döwlet we hususy düzümleriniň goldawy bilen sebitiň oba hojalyk pudagyny ösdürmekde möhüm meýdança öwrüldi.

Penamyrat HOJAMYRADOW,

S.A.Nyýazow adyndaky Türkmen oba hojalyk
uniwersitetiniň talyby.