Birleşen Arap Emirlikleriniň Dubaý şäherinde 26–30-njy ýanwar aralygynda geçiriljek “Gulfood 2026” halkara sergisine Türkmenistanyň birnäçe iri kompaniýalary — “Asly”, “Erem”, “Miwe” we “Tudana” gatnaşar. Bu barada serginiň resmi web sahypasynda maglumat ýerleşdirildi.

Bu halkara çäre azyk senagaty ulgamyndaky täzeçil çözgütleri, ekologik taýdan durnukly önümçilik usullaryny hem-de häzirki zaman tehnologiýalaryny tanyşdyrmak maksady bilen dünýäniň öňdebaryjy öndürijilerini we täze brendlerini bir ýere jemleýär.

Serginiň çäginde alkagolsyz içgiler, süýt we et önümleri, däneli hem-de kösükli ekinler, ýag önümleri, dürli halklaryň milli tagamlary, şeýle-de sagdyn we berhiz iýmitler üçin niýetlenen tematik pawilýonlar guralar.

Şu ýyl “Gulfood” sergisine 130 müňden gowrak myhmanyň gelmegine garaşylýar. Çärä dünýäniň 130-dan gowrak ýurdundan 6 müň 500-den fazla kompaniýa gatnaşar.

“Gulfood” azyk we içgi senagaty, şeýle hem myhmanhana-restoran ulgamy üçin enjamlary hödürleýän sebitdäki iň uly halkara sergileriň biri bolup, her ýyl dürli ýurtlardan hünärmenleri we işewürleri özüne çekýär.

Möwlamberdi Kürraýew,

S.A.Nyýazow adyndaky Türkmen oba hojalyk
uniwersitetiniň talyby.