2026-njy ýylyň 30-njy ýanwarynda Hywa şäherinde Suw hojalyk meseleleri boýunça bilelikdäki türkmen-özbek hökümetara toparynyň bäşinji mejlisi geçirildi. Mejlisde türkmen wekiliýetine Türkmenistanyň Ministrler Kabinetiniň Başlygynyň Orunbasary T.Atahallyýew, özbek wekiliýetine bolsa Özbegistan Respublikasynyň Prezidentiniň oba hojalygyny ösdürmek boýunça geňeşçisi Ş.Ganiýew ýolbaşçylyk etdi. Bu barada Türkmenistanyň Daşary işler ministrliginiň resmi web-saýtynda habar berildi.

Duşuşyga iki ýurduň suw serişdelerini dolandyrmak, irrigasiýa ulgamyny ösdürmek we daşky gurşawy goramak boýunça degişli döwlet edaralarynyň ýolbaşçylary hem-de hünärmenleri gatnaşdylar.

Çykyşlarda taraplar hoşniýetli goňşuçylyk, özara ynam we deňhukuklylyk ýörelgelerine esaslanýan türkmen-özbek gatnaşyklarynyň ýokary derejesini aýratyn bellediler. Şeýle-de, suw hojalyk ulgamyndan daşary ykdysady, infrastruktura hem-de ynsanperwer ugurlarda hyzmatdaşlygyň giňeldilmegine bolan umumy gyzyklanma nygtaldy.

Taraplar suw serişdelerini dolandyrmakdaky durnukly hyzmatdaşlygyň azyk howpsuzlygyny üpjün etmekde, oba hojalygynyň ösüşinde hem-de sebit durnuklylygyny berkitmekde möhüm strategik ähmiýete eýedigini bellediler.

Mejlisiň dowamynda suw serişdelerini tygşytly peýdalanmaga gönükdirilen häzirki zaman tehnologiýalaryny ornaşdyrmak, gözegçilik we hasaba alyş ulgamyny kämilleşdirmek, şeýle hem hünärmenleriň taýýarlygyny ýokarlandyrmak meseleleri ara alnyp maslahatlaşyldy. Howa şertleriniň üýtgemegi bilen bagly töwekgelçilikleri azaltmaga hem aýratyn üns berildi.

Duşuşygyň jeminde taraplar hyzmatdaşlygyň hukuk we institusional esaslaryny mundan beýläk-de berkitmäge, şeýle-de geňeşmeleri yzygiderli geçirmäge ygrarlydyklaryny tassykladylar. Mejlis netijeli ýagdaýda geçip, onuň ahyrynda degişli Teswirnama gol çekildi.

Ahmet AGAÝEW,

Halkara senagatçylar we telekeçiler
uniwersitetiniň talyby.