S.A. Nyýazow adyndaky Türkmen oba hojalyk uniwersitetinde “Eksportyň esaslary: kärhanalar halkara bazarlaryna nähili çykýarlar” atly açyk sapak geçirildi. Bu duşuşyk ýaşlaryň telekeçilik ukyplaryny ösdürmek, olaryň halkara söwda gatnaşyklary baradaky düşünjelerini giňeltmek hem-de eksport mümkinçilikleri boýunça giňişleýin maglumat bermek maksady bilen guraldy.

Açyk sapakda satyş boýunça bilermen Azat Annadurdyýew çykyş edip, häzirki wagtda kärhanalaryň daşary ýurt bazarlaryna çykmagynyň möhüm ugurlary barada gürrüň berdi. Ol eksport işiniň esasy ýörelgeleri, daşary ýurt bazarlaryny öwrenmegiň usullary hem-de önümleriň halkara bazarlarynda bäsdeşlige ukyplylygyny üpjün etmegiň şertleri barada maglumat berdi.

Duşuşygyň dowamynda global söwda giňişligindäki mümkinçilikler, eksport strategiýalaryny taýýarlamagyň aýratynlyklary we kärhanalaryň daşary ýurt hyzmatdaşlary bilen gatnaşyklaryny ösdürmegiň ýollary barada hem durlup geçildi. Şeýle-de çykyşda eksport işinde marketing strategiýalarynyň, bazar seljermeleriniň hem-de halkara hyzmatdaşlygyň ähmiýeti aýratyn bellenildi.

Açyk sapagyň dowamynda talyp ýaşlar özlerini gyzyklandyrýan soraglaryny berip, eksport işini guramak we halkara bazarlarynda üstünlik gazanmak boýunça peýdaly maslahatlary aldylar. Şeýle duşuşyklaryň ýaşlaryň ykdysady bilim derejesini ýokarlandyrmaga hem-de olaryň telekeçilik başlangyçlaryny ösdürmäge itergi berýändigi nygtaldy.

Duşuşyga Türkmenistanyň Bilim ministrligi, S.A Nyýazow adyndaky Türkmen oba hojalyk uniwersiteti, TSTP-niň Aşgabat şäher komitetiniň ýanynda “Ýaş telekeçiler” merkezi hem-de TMÝG-niň Maglumat, maslahat beriş we meýletinçilik hereketiniň işleri boýunça Merkezi bilelikde gurady.