Türkmenistanyň tebigy baýlyklarynyň arasynda aýratyn orun eýeleýän “mawy ýangyç” — tebigy gaz boýunça ýurdumyzda üstünlikli işler alnyp barylýar. “Lebapgazçykaryş” müdirligi 2025-nji ýylyň ilkinji dokuz aýynda 6 milliard 905 million kub metr tebigy gaz çykardy. Bu görkeziji meýilnamadan ep-esli ýokary bolup, eksport ugrunda hem üstünlikli ýerine ýetirildi. Bu barada Türkmenistanyň resmi metbugaty habar berdi.

Malaý–Bagtyýarlyk ugry boýunça 3 milliard 771 million kub metre golaý gaz geçirilip, meýilnama 135,9 göterim ýerine ýetirildi. Şeýle hem ýylyň başyndan bäri 22 müň 791 tonna gaz kondensaty öndürilip, bu görkeziji meýilnamadan 9 göterim ýokary boldy.

Bu üstünlikler sebitiň “Malaý” we “Gadyn” gaz gysyjy desgalarynyň netijeli işiniň, şeýle-de gazçylaryň yhlasly zähmetiniň miwesidir. Müdirligiň işgärleri döredilen giň mümkinçilikler üçin hormatly Prezidentimize we Gahryman Arkadagymyza tüýs ýürekden minnetdarlyk bildirýärler.

Nursähet ALLAMYRADOW,

Türkmenistanyň Döwlet energetika institutynyň
mugallymy.