Türkmen gelinleri ähli döwürlerde hem gowy lybaslary geýip, iň nepis şaý- sepleri dakynypdyrlar. Egni älemgoşaryň nurana reňklerini özünde jemleýän milli lybasly, başlary sary öýmelidir, ýaglykly gelin – gyzlary näçe wasp etseň hem az ýaly. On barmagyň gudratyndan dörän milli lybaslar zenanlaryň inçe sungatyň ussadylygyny ykrar edýär.

«El-hünärli – il gezer» diýen ene- mamalar içinde päk zähmeti, el hünäri bilen abraý alan zenanlary nusga hökmünde görkezip, ýaşlary hünäre ugrukdyrmagy başarypdyrlar. Ene-mamalardan nesillere nusga galan el keşdeleri ak gaýmalar döwrebap nusgalar bilen sepleşip gidýär.

Gelinleriň toý lybaslaryny  köpsanly şaý-sepler bezäpdir. Gadym döwürlerden bäri olar diňe bir owadanlyk üçin zenan döşünde ýerleşdirilmän eýsem gözden dilden goraýan doga-tumar hökmünde hem ulanypdyrlar. Gelinleriň toý lybasyndaky jaňjagazlaryň owazy olary gyz gözelligine  aşyk al-arwahlardan gorapdyr.

Işine ezber on barmagyndan dür dökülýän gelinlerimiz il arasynda uly abraýa eýe. Onuň ýanyna iş öwrenmäge ýa-da dürli biçüwdäki egin-eşikleri tikdirmäge gelýänleriň yzy üzülenok. Üýtgeşik nagyşly geýimler, nepis tikilen egin-eşikler, owadan keşdeler göreniň höwesini artdyrýar.

Ene-mamalardan miras galan biçüwler, keşdeler, gaýmalar hiç haçan öz ähmiýetini ýitirmän, barha giňäp barýar. Zenanlar owadan we älemgoşar  öwüşgünli ketenileri täze biçüwde tikinýärler. Bu olaryň gözelligine goşant goşýar.

Türkmen ketenisi bolsa, özüniň owadanlygy bilen dünýäni haýran edýär. Egin-eşiklerdäki millilik zamanabap geýinmek medeniýeti bilen sazlaşanda lybaslaryň gözelligi has-da artýar. Bu sazlaşyk türkmen zenanlaryň ajaýyp dünýäsini, edebini, näzik duýgularyny, belent mertebesini görkezýär.

El işlerine ussat ene-mamalar nagyşlaryň nusgalaryny, köýnek biçip-tikmek usullaryny apalap, öz gyzlaryna, gelinlerine öwredip, häzirki nesle ýetiripdirler. 

Suraý PUREŞOWA,

Türkmen oba hojalyk institutynyň talyby.