Daşary ýurt dillerini öwretmek häzirki zaman bilim ulgamynda möhüm ugurlaryň biridir. Dili öwretmegiň baş maksady okuwçylaryň şol dili durmuş gatnaşyklarynda erkin we manyly peýdalanyp bilmek ukybyny ösdürmekden ybaratdyr. Munuň üçin okuwçylaryň diňlemek, gürlemek, okamak we ýazmak ýaly dil taýýarlygynyň ähli taraplary utgaşdyrylyp işlenilýär. Dili öwretmekde meýilleşdirilen sapaklar diňe maglumat bermek bilen çäklenmän, okyjynyň döredijilikli pikirlenme, aň-düşünje we medeniýetara aragatnaşyk ukybyny hem ösdürmelidir.

Daşary ýurt dilini okatmakda häzirki wagtda kommunikatiw we amaly esasly çemeleşimler ileri tutulýar. Kommunikatiw çemeleşme dili durmuş ýagdaýlarynda ulanmak arkaly öwrenmegi üpjün edýär. Bu usulda dialoglar, söhbetdeşlikler, rol oýunlar we toparlaýyn işler aýratyn orunda durýar. Şeýle hem wideo, audio ýazgylar, elektron maglumatlar we multimedia serişdeleri dili özleşdirmekde ähmiýetli bolup, diňlemek we düşünmek endikleriniň ösüşine ýardam edýär.

Dil öwretmegiň üstünlikli bolmagy üçin okuwçylaryň psihologik taýdan gyzyklanmasyny artdyrmak aýratyn möhümdir. Çagalaryň ýa-da talyplaryň dili öwrenmek islegi güýçlendirilse, olar täze sözleri we gurluşlary ýeňil kabul edýärler. Şeýlelikde, daşary ýurt dillerini öwretmek diňe dil derejesini ýokarlandyrmak däl-de, eýsem dünýäňi giňeltmek, täze medeniýetleri tanamak we halkara aragatnaşyk gurmak üçin möhüm mümkinçilik döretýär.

Ogulmaral BOPBYÝEWA,

Türkmenistanyň Döwlet energetika institutynyň
mugallymy.