“Türkmenistan-Bitaraplygyň mekany” ýylynda Babadaýhan etrabynyň Türkmenistan daýhan birleşiginiň kärendeçileri güýzlük dänäniň bereketli hasylyny ýetişdirdiler.

          Ýylboýy daýhan yhlasy siňip, atyzlarda kemsiz kemala gelen, bol hasyl eçilýän örän boldumly meýdanlar gözleriňe diýseň yssy görünýär. Ene topraga alyn derini siňdirip, ondan rysgal-bereket tapýan daýhanlaryň halal zähmetine guwanjyň goşalanýar.

          Şu günler daýhan birleşikde galla oragy gün-günden gyzyşýar. Hojalykda orak möwsümini etrabyň tehniki taýdan hyzmat ediş kärhanasynyň mehanizatorlary alyp barýarlar. Möwsümiň gije-gündiziň dowamynda iş çalyşygy usulynda alnyp barylmagy, edilýän tehniki hyzmatlaryň iş üstünde guralmagy, TDP-niň Babadaýhan etrap komiteti tarapyndan galla oragyna gatnaşyjylaryň arasynda zähmet bäsleşiginiň yglan edilip, olaryň höweslendirip durulmagy orak möwsümini ýokary işjeňlikde alyp barylmagyna uly ýardam berýär. Hojalykda bugdaý hasylyndan bol hasyl alan kärendeçileriň sany barha artýar.

         Hojalygyň kärendeçisi Baýsähet Amansähedow 3 gektar ýerde boldumly däne hasylyny ýetişdirdi. Onuň her gektar ýerinde 37 sentnere golaý bugdaý hasylyny ýetişdirip, ony ýygnap, döwlet ammaryna goşdy.6 gektar meýdanda hasyl ýetişdiren Annanazar Nazarowyň gazanan görkezijisi hem görnükli boldy. Ol her gektar ýerden 39 sentnere golaý hasyl aldy. Kärendeçi Suraý Nazarowanyň gazanan görkezijisi köplerden aýratyn tapawutlandy. Ol 5 gektar  ýeriniň her gektardan ýygnap alan dänesiniň mukdary 42 sentnerden geçdi.Şy ýylda kärendeçiler Nurbibi Ataýewa 10, Çynar Abaýewa 11.5 gektar ýerde ak bugdaýyň hasylyny kemala getiripdirler.Olaryň her biri degişlilikde 29.5; 33.1 sentner däne aldy. 7 gektar ýeriň eýesi bolan kärendeçi Hudaýberdi Berdiýewiň her gektardan gazanan görkezijisi 31 sentnere barabar boldy. Gülaýym Esenmyradowanyň 3 gektar ýeriniň her gektaryndan alan däne hasyly 29.4 sentnere ýetdi.   

        Şonça gektar ýeriň eýesi bolan Gültäç Hommadowanyň görkezijisi ýokardaky kärendeçiniňkä deň boldy. 10 gektar ak ekinli meýdandan Annadursun Berdiýewanyň her gektar ýerden gazanan netijesi  25 sentnere golaýlady.

          Hojalykda orak möwsüminiň barha gyzyşmagy bilen ýerden bol hasyl alýan gallaçy kärendeçileriň hatary barha artýar.