Berkarar döwletiň täze eýýamynyň Galkynyşy döwründe Türkmenistanyň ykdysady syýasatynyň ileri tutulýan ugurlarynyň biri hususy sektory goldamak we telekeçilik üçin amatly şertleri döretmekden ybaratdyr. Häzirki zaman dünýä tejribesi görkezişi ýaly, kiçi we orta telekeçilik diňe bir önüm öndüriji däl, eýsem milli ykdysadyýetiň durnuklylygyny üpjün edýän, innowasiýalary durmuşa ornaşdyrýan we täze iş orunlaryny döredýän esasy güýçdür.

Türkmenistanda telekeçiligiň ösmegi üçin döredilýän hukuk we maliýe binýady ýylsaýyn kämilleşýär. Hormatly Prezidentimiziň baştutanlygynda amala aşyrylýan ykdysady özgertmeler hususy telekeçileriň döwlet bilen deňhukukly hyzmatdaşlygyna şert döretdi. Döwlet banklary tarapyndan kiçi we orta göwrümli önümçilik taslamalaryna berilýän pes göterimli we uzak möhletli karzlar telekeçileriň täze tehnologiýalary satyn almagyna badalga berýär. Önümçilik pudagynda täze işe başlaýan telekeçiler üçin döredilýän ýeňillikler olaryň bäsdeşlige ukyplylygyny ýokarlandyrýar.

Kiçi we orta telekeçilik ýurduň azyk howpsuzlygyny üpjün etmekde we daşary ýurtdan getirilýän harytlaryň ornuny tutmakda uly sepgitleri eýeledi. Bu gün bazarlarymyzdaky we dükanlarymyzdaky azyk harytlarynyň, dokma önümleriniň we gurluşyk serişdeleriniň agramly bölegi ýerli telekeçilerimiz tarapyndan öndürilýär.

Jemläp aýdanymyzda, kiçi we orta telekeçilik Türkmenistanyň ykdysadyýetiniň durnukly ösmeginde "altyn köpri" bolup hyzmat edýär. Döwlet tarapyndan berilýän yzygiderli goldaw we telekeçileriň innowasion çemeleşmeleri ýurdumyzyň geljekde has-da gülläp ösmeginiň girewidir.

Aýhan NURÝAGDYÝEW,
Türkmenistanyň senagatçylar we
telekeçiler uniwersitetiniň talyby.