Lebap welaýat oba hojalyk önümçilik birleşigine «John Deere 61175M» kysymly kuwwatly kombaýnlaryň ýene-de 50-si gelip gowuşdy. Arkadag Serdarly bagtyýar ýaşlar ýylynyň galla oragy möwsümine çenli olaryň üstüniň ýene-de 16 kombaýn bilen ýetirilmegine garaşylýar.

Täze kombaýnlaryň köpugurlydygyny aýratyn nygtamak gerek. Şeýlelikde, olary däneli ekinleriň islendik görnüşiniň oragynda peýdalanmak mümkindir.

Şu günler birleşigiň ýerlerdäki tehniki hyzmat ediş kärhanalarynda traktorlary we ekijileri geljek baharda geçiriljek gowaça ekişine taýýarlamak boýunça işler hem ýokary depginde alnyp barylýar. Soňky ýyllarda satyn alnan Fransiýanyň «Monosem» kompaniýasynyň takyk gowaça ekijileri, ABŞ-nyň «Ortman-8375» kysymly, bir wagtyň özünde hem dökün berýän, hem topragy ýumşadýan enjamlary welaýatda oba hojalyk tehnikalarynyň mümkinçiliklerini artdyrýar. Bu tehnikalar sakasynda hormatly Prezidentimiz duran oba hojalyk özgertmelerini netijeli durmuşa geçirmäge ýakyndan ýardam berýär.