Google kompaniýasynyň Ýaponiýadaky bölümi Gboard Conveyor Belt Version atly özboluşly klawiaturany köpçülige hödürledi. Enjamyň esasy aýratynlygy adaty klawiaturalardan tapawutlylykda, ulanyjynyň barmaklaryny dürli düwmelere geçirmek zerurlygynyň ýokdugydyr. Harplar ýerleşdirilen hatarlar konweýer lentasy ýaly hereket edip, zerur düwmeleri ulanyjynyň barmaklarynyň öňüne getirýär.

Klawiatura dört sany üznüksiz lentadan ybarat bolup, olaryň her birinde 29 düwme ýerleşýär. Enjam çeýe çap edilen elektron platalaryň we aýlanýan barabanlaryň kömegi bilen işleýär.

Klawiaturany ulanmak üçin barmaklary belli bir ýagdaýda saklamak we zerur harp hereket edýän hataryň üstünden geçende düwmä basmak ýeterlikdir. Enjamyň döredijileriniň bellemegine görä, bu usul tekst ýazýan wagty elleriň hereketini azaltmaga we uzak wagtlap işlemegiň netijesinde ýüze çykýan ýadawlygy peseltmäge gönükdirilendir.

Täze klawiatura adaty giriş enjamlarynyň gurluşyna başgaça çemeleşmäni hödürläp, kompýuter bilen işlemegiň has amatly usullaryny gözlemegiň mysaly bolup durýar. 

Geldimyrat ÇÄRŞEMOW,
Türkmen oba hojalyk institutynyň 1-nji ýyl talyby.