Dünýäde oba hojalygy diňe bir ýaşaýşy üpjün edýän pudak bolman, eýsem ykdysadyýetiň, jemgyýetiň durnukly ösüşiniň esasy hereketlendirijisine öwrülýär. XXI asyrda bu ugurda üstünlik gazanmak üçin diňe ýer we suw ýetmezçilik edýär. Häzir möhüm zat – ylmymyzy, innowasiýany we sanly ulgamy oba hojalygyna girizmek. Türkmenistan hem bu ugurda täze sepgitlere çykmaga ymtylýar.

Ýapyk ýyladyşhanalar häzirki döwrüň oba hojalygynda iň möhüm çözgütleriň biridir. Bu tehnologiýanyň artykmaçlygy köp: ýyl boýy dürli gök önümleri öndürmek mümkinçiligi, howanyň üýtgemeginden aslynda garaşsyz bolmak, ýerden we suwdan tygşytly peýdalanmak. Türkmen daýhanlary häzirki wagtda häzirki zaman ýyladyşhanalarda pomidor, hyýar, burç ýaly önümleri ösdürýärler we diňe içerki bazara däl, eýsem daşary ýurtlara-da eksport edýärler.

Oba hojalygynda iň uly kynçylyk — suwuň ýetmezçiligi. Ýer ýüzünde suw serişdeleri çäkli, şonuň üçin damjalaýyn suwaryş ulgamy ýaly tygşytlaýjy tehnologiýalaryň ornaşdyrylmagy aýratyn ähmiýetlidir. Bu usul bilen suw göni ösümligiň köküne ýetýär, her damjasy peýdalanylýar. Netijede suwuň sarp edilişi iki esse azalsa-da, hasyl iki esse artýar. Türkmenistan ýaly gurak klimaty bolan ýurt üçin bu çözgüt oba hojalygynyň geljegindäki özeni hasaplanýar.

Sanly ulgam häzirki wagtda oba hojalygyny düýpgöter üýtgedýär. Häzirki zaman tehnologiýalary arkaly ýerleriň kartasyny düzmek, topragyň ýagdaýyny seljermek, ekinleriň ösüşini dronlar arkaly gözegçilikde saklamak mümkin bolýar. Şeýle sanly maglumatlar daýhanyň karar kabul etmegini ýeňilleşdirýär: haçan ekmeli, haçan suwarmaly, haçan dökün bermeli... Netijede wagtyň, serişdeleriň tygşytlanmagy bilen birlikde hasyl ýokary bolýar.

Türkmenistanyň topragy we klimaty dürli oba hojalyk önümlerini ösdürmäge amatly. Döwrebap tehnologiýalaryň ornaşdyrylmagy bilen diňe içerki bazary üpjün etmek däl, eýsem daşary ýurt bazarlaryna çykmak mümkinçiligi giňelýär. Häzirki wagtda ýurdumyz gök önümleri, bakja önümleri, pagta we bugdaý bilen tanalýar. Geljekde bolsa täze eksport ugurlarynyň, organik önümleriň we ýokary hilli azyk markalarynyň döremegi garaşylýar.

Geljekde oba hojalygy diňe ýerden hasyl almak däl, eýsem ylmyň we tehnologiýanyň iň täze gazananlaryny ulanmak bilen öňe gidişlik gazanmakdyr. Ýapyk ýyladyşhanalar, suw tygşytlaýjy tehnologiýalar, sanly gözegçilik ulgamlary Türkmenistanda oba hojalygynyň täze ýüzüni açýar. Bu mümkinçilikler ýurdumyzy diňe öz ilatyny üpjün edýän däl, eýsem sebitde azyk howpsuzlygyny üpjün etmäge ukyply döwlete öwürýär.

Söýün AKMÄMMEDOW,
S.A.Nyýazow adyndaky TOHU-niň III ýyl talyby.