2025-nji ýylyň 4-nji iýunynda, Daşky gurşawy goramagyň bütindünýä güni mynasybetli, Aşgabatda “Ekologiýa üçin innowasiýalar we telekeçilik başlangyçlary” atly maslahat geçirildi. Bu çäre Türkmenistanyň Senagatçylar we telekeçiler partiýasynyň Aşgabat şäher komiteti bilen Türkmenistanyň Ekologiýa hereketi jemgyýetçilik guramasynyň bilelikde guramagynda geçirildi.

Maslahata ýokary okuw mekdepleriniň, şol sanda Türkmen döwlet binagärlik-gurluşyk institutynyň talyplary gatnaşdy. Ilkinji çykyş bilen çykyş eden Türkmenistanyň Ekologiýa hereketi jemgyýetçilik guramasynyň başlygy Arazbike Jumäýewa ýurdumyzda ekologiýa ulgamynda gazanylýan üstünlikler we jemgyýetçilik guramalarynyň bu ugurda alyp barýan işleri barada durup geçdi.

Şeýle-de Türkmenistanyň Senagatçylar we telekeçiler partiýasynyň Aşgabat şäher komitetiniň ýanyndaky “Ýaş telekeçiler” merkeziniň utgaşdyryjysy we Türkmenistanyň Ekologiýa hereketi jemgyýetçilik guramasynyň işjeň agzasy hökmünde Merdan Ataýew çykyş etdi. Ol çykyşynda ýaşlaryň arasynda ekologiýa bilen bagly “Ýaşyl endikleri” ornaşdyrmagyň möhümdigini nygtady. Merdan Ataýew ýaşlaryň gündelik durmuşynda tebigata hormat goýmak, gaýtadan ulanylýan serişdeleri ulanmak ýaly ekologiýa taýdan peýdaly endikleriň ösdürilmeginiň diňe bir daşky gurşawy goramak bilen çäklenmän, olaryň jemgyýetçilik jogapkärçiligini hem ösdürýändigini belläp geçdi.

Maslahatyň dowamynda Ogulnabat Ataýewa, Türkmen döwlet binagärlik-gurluşyk institutynyň mugallymy hökmünde “Organiki däl maddalaryň himiki tehnologiýasy” barada çykyş etdi. Şeýle-de, Bossan Rejepowa we Güljemal Pirliýewa dagy degişli ugurlar boýunça çykyş etdiler.