Seýitnazar Seýdi adyndaky Türkmen döwlet mugallymçylyk institutynyň täze binalar toplumynyň gurluşygy häzirki wagtda jemleýji tapgyra gadam basdy. Meýilleşdirilişine laýyklykda, giň möçberli bu taslamany 2026-njy ýylyň sentýabr aýyna çenli doly tamamlap, täze okuw ýylynyň başlanmagyna gabat getirip ulanmaga bermek göz öňünde tutulýar.

Türkmenabat şäherinde ýerleşýän täze bilim şäherçesiniň gurluşygyny Türkmenistanyň Senagatçylar we telekeçiler birleşmesiniň agzasy bolan «Nahal» hojalyk jemgyýeti alyp barýar. Taslama takmynan 26 gektar meýdany eýeläp, döwrebap ýokary okuw mekdebiniň ähli zerur infrastrukturasy bilen üpjün edilmegini maksat edinýär.

Täze toplumyň düzümine dolandyryş-okuw binasy, 700 we 200 orunlyk mejlisler zallary, fakultetler üçin niýetlenen iki okuw binasy girýär. Şeýle hem mugallymlar üçin 12 öýli ýaşaýyş jaýy, talyplar üçin 2 müň orunlyk bäş sany umumy ýaşaýyş jaýy, 1000 orunlyk naharhana, 700 orunlyk kitaphana göz öňünde tutulýar. Sport infrastrukturasynyň çäginde 500 orunlyk stadion, ýapyk sport zaly we üç sany açyk sport meýdançasy ýerleşdirilýär. Awtoulaglar üçin hersi 200 orunlyk açyk hem-de bassyrmaly awtoduralgalar hem taslamanyň möhüm bölegidir. Mundan başga-da, hojalyk we hyzmat maksatly tehniki binalar hem gurluşyk meýilnamasyna girizildi.

Ýakyn wagtda täze toplumda ýokary tehnologiýaly enjamlary ornaşdyrmak boýunça taýýarlyk işleri geçirilýär. Okuw binalarynda häzirki zaman okuw-tehniki serişdeleri, maglumat ulgamlary hem-de innowasion enjamlar oturdylar. Bu enjamlar dünýäniň birnäçe öňdebaryjy döwletlerinden üpjün ediler.

Seýitnazar Seýdi adyndaky Türkmen döwlet mugallymçylyk instituty ýurdumyzyň iň baýry ýokary okuw mekdepleriniň biri hökmünde tanalýar. Bu ýokary okuw mekdebi milli bilim ulgamyna ýokary derejeli mugallym hünärmenleri taýýarlamakda möhüm orny eýeleýär. Häzirki wagtda institutda takyk we tebigy bilimler, taryh, pedagogika, türkmen dili we edebiýaty, rus hem-de gündogar dilleri, roman-german dilleri ýaly fakultetler hereket edýär. Şeýle-de hünär derejesini ýokarlandyryş fakulteti hem-de talyplar sport kluby iş alyp barýar.

Täze şäherçäniň işe girizilmegi ýokary okuw mekdebiniň maddy-tehniki binýadyny has-da pugtalandyryp, bilim beriş ulgamynyň hilini ýokarlandyrmaga giň mümkinçilik açar diýlip garaşylýar.