Astrahanyň döwlet lukmançylyk uniwersitetinde dürli hünärler we ugurlar boýunça Türkmenistandan 180 sany talyp bilim alýar. Bu barada, Türkmenistanyň Astrahandaky diplomatik wekilhanasynyň resmi saýtynda Türkmenistanyň konsuly Nury Gölliýewiň Astrahan uniwersitetiniň rektory Olga Başkina bilen bolan duşuşygyndan soň habar berilýär.

Belläp geçsek, häzirki wagtda Türkmenistandan baran lukman-ordinatorlar Russiýanyň uniwersitetinde diplomdan soňky taýýarlygyny geçýärler.

Türkmenistanyň konsuly Nury Gölliýewiň, Astrahan uniwersitetiniň rektory Olga Başkina bilen bolan duşuşygyndan soň taraplar hyzmatdaşlygyň hem-de ylmy we amaly maslahatlary, akademiki alyş-çalyşlary, bilelikdäki ylmy barlaglary we lukmançylyk olimpiadalaryny geçirmegiň geljegini şeýle-de Astrahan döwlet lukmançylyk uniwersitetinde türkmen raýatlarynyň bilim almagy bilen baglanyşykly möhüm meseleleri ara alyp maslahatlaşdylar.