2025-nji ýylyň 30-njy oktýabrynda Türkmenistanyň Aktau şäherindäki Konsullygynda Halkara parahatçylyk we ynanyşmak ýylyna, şeýle hem ýurdumyzyň hemişelik Bitaraplygynyň 30 ýyllygyna bagyşlanan dabaraly çäre geçirildi. Bu barada Türkmenistanyň resmi metbugaty habar berdi.

Çärä Ş.Ýesenow adyndaky Hazar tehnologiýalar we inžiniring uniwersitetiniň talyp ýaşlary, Mangystau welaýatynda ýaşaýan türkmen raýatlary hem-de jemgyýetçilik guramalarynyň wekilleri gatnaşdylar.

Türkmenistanyň konsuly M.Abdyllaýew çykyşynda BMG-niň Baş Assambleýasy tarapyndan üç gezek ykrar edilen ýurdumyzyň hemişelik Bitaraplyk hukuk derejesiniň Garaşsyzlyk ýyllaryndaky iň uly üstünligiň biri bolup durýandygyny nygtady. Bitaraplygyň soňky otuz ýylda milli syýasatymyzyň, dünýä bileleşigi bilen gatnaşyklarymyzyň we sebitleýin durnuklylygy üpjün etmekdäki işjeňligimiziň möhüm bölegine öwrülendigi aýratyn bellenildi.

Çäräniň çykyşlarynda ýurduň Prezidenti tarapyndan durmuşa geçirilýän syýasy, ykdysady, medeni we jemgyýetçilik ösüşiniň netijeleri, şeýle hem Türkmenistanyň halkara derejesinde parahatçylyk we ynanyşmak ýörelgelerini ilerletmekdäki ornuna üns berildi.

Dabarada ýakymly we dostlukly ýagdaý emele geldi. Myhmanlara türkmen halkynyň myhmansöýerlik dessurlaryndan nyşan edýän milli tagamlar hödürlenildi.

Bu duşuşyk türkmen halkynyň döwletara gatnaşyklarynda parahatçylygy, ynanyşmagy we hoşniýetli goňşuçylygy berkitmäge bolan tagallalarynyň nobatdaky subutnamasy boldy.

Yklym Ataýew,

Türkmenistanyň Daşary işler ministrliginiň
Halkara gatnaşyklary institutynyň talyby.