Berkerar döwletiň bagtyýarlyk döwründe “Türkmenistan – Bitaraplygyň mekany” ýylynda kärendeçi daýhanlarymyzyň ýerden bol hasyl almagynda hem-de önjeýli zähmet çekmeklerinde uly mümkinçilikler döredilýär. Şeýle mümkinçiliklerden peýdalanýan Ahal welaýatynyň Sarahs etrabynyň pagtaçy kärendeçileri hem özleriniň yhlaslaryny gaýgyrmaýarlar. Şu ýyl etrap boýunça 18 müň 500 gektar meýdanda gowaça hasylyny ekip, ak altynyň 35 müň 730 tonnasyny watan harmanyna tabşyrmaklygy meýilleşdirýän kärendeçi babadaýhanlar şu günler gowaça meýdanlaryna ideg etmek boýunça işleri agrotehnikanyň talaplaryna laýyklykda alyp barmakda öz yhlaslaryny görkezýärler.

     Her bir çäräniň agrotehniki möhletlerde alyp barylmagynyň wajypdygyna oňat düşünýän pagtaçy kärendeçiler ekine karbamid, selitra ýaly azotly dökünleri bermek işine aýratyn jogapkärçilikli çemeleşýärler. Etrabyň zähmetsöýer daýhanlary gowaça meýdanlarynda dördünji hatarara bejeriş işlerini, üçünji otag işlerini, ikinji, üçünji ösüş suwlaryny tutmak zyýankeşlere garşy dürli dermanlary bermek işlerini geçirmek ýaly agrotehniki çäreleri hem ünsden düşürmeýärler. Häzirki döwürde ikinji iýmitlendirme işleri geçirilýär. Etrabyň tehniki hyzmat ediş kärhanasy döwlet tarapyndan daşary ýurtlardan  satyn alyp beren kuwwatly tehnikalary saz we bökdençsiz erk edip bejergi işlerinde pagtaçylara uly ýardam berýärler. Etrabyň jemgyýetçilik guramalary hem pagtaçy kärendeçiler bilen ýakyndan aragatnaşyk saklap olaryň armasyny ýetirýärler. Gyzgalaňly günlerde özlerine döredilýän giň mümkinçiliklerden peýdalanýan pagtaçy kärendeçileriň çekýän yhlasly zähmeti watan harmanyna ak altynyň bol hasylyny tabşyrmaklygyň hötdesinden geljekdikleri aýdyňlygy bilen duýulýar.