Şu günler Babadaýhan etrabynda pagta ýygymy depginli dowam edýär. Etrapda oba hojalygyndaky bu jogapkärli möwsümiň guramaçylykly alnyp barylmagynda pagtaçylara edilýän medeni hyzmat uly ähmiýete eýedir. Etrabyň “Ak altyn” daýhan birleşiginiň meýdan düşelgesinde günorta çagy gysga wagtlyk arakesme wagtynda guralan çäre ýakymly duýgulara beslendi. Etrap häkimliginiň, Kärdeşler arkalaşyklarynyň etrap birleşmesiniň, TDP-nyň etrap komitetiniň, TAP-nyň etrap komitetiniň, TMÝG-nyň etrap Geňeşiniň hem-de etrap medeniýet bölüminiň bilelikde guramagynda geçen medeni çärede zähmetkeşlere „Türkmenistan-Bitaraplygyň mekany“ ýylyny zähmet üstünliklere beslemekleri, “ak altynyň” ýekeje hanasyny hem yrýa  etmän ýygnamaklary arzuw edildi. Ol ýerde aýdym-sazly çykyşlar guraldy. Çärä pagtaçy kärendeçiler, ýygymçylar, mehanizatorlar we möwsüme dahylly beýleki zähmetkeşler gatnaşdylar. Bu gyzykly geçen çärede etrabyň medeniýet we sungat işgärleriniň ýerine ýetiren aýdym-sazlarynda Watanymyzda bitirlýän beýik işleriniň waspy ýetirildi. Joşgunly tans çykyşlary we ýaş aýdymçylaryň aýdan aýdymlary, wäşilerimiziň ýerine ýetiren gülkili sahna çykyşlary zähmetkeşlerde ýatdan çykmajak pursatlary döretdi. Çäräniň ahyrynda kombaýynçylara, öňdebaryjy kärendeçilere, ýüwrük elli ýygymçylara etrabyň jemgyýetçilik guramalarynyň ýadygärlik sowgatlary dabaraly ýagdaýda gowşuryldy.