Türkmenistanyň daşary işler ministriniň orunbasary Ahmet Gurbanow Bütindünýä söwda guramasynyň wekiliýeti bilen ýurdumyzyň bu gurama agza bolmagy bilen baglanyşykly hyzmatdaşlygy işjeňleşdirmegiň möhüm meselelerini ara alyp maslahatlaşdy.
 

Türkmenistanyň DIM-niň binasynda geçirilen duşuşyga BSG-e agza bolmak departamentiniň direktory Maika Oşikawanyň ýolbaşçylygyndaky wekiliýet agzalary gatnaşdy.

Söhbetdeşler Türkmenistanyň BSG-ä agza bolmagy üçin taýýarlyk çärelerini geçirmegi bilen baglanyşykly wezipeleriň amala aşyrylyşy boýunça meýilnamalaryny ara alyp maslahatlaşdylar.

Ýurdumyz häzirki wagtda Daşary söwda düzgüni barada Ähtnamany taýýarlamak boýunça netijeli içerki işleri alyp barýar. Şunuň bilen birlikde, Türkmenistanyň BSG-e agza bolmagy bilen bagly meseleleri öwrenmek boýunça Pudagara Hökümet toparynyň yzygiderli işi hem bellenildi.

Duşuşygyň ahyrynda oňa gatnaşyjylar Türkmenistan bilen BSG-niň arasyndaky hyzmatdaşlygyň geljegi bilen baglanyşykly ileri tutulýan meseleler boýunça pikir alyşdylar.

Dawut Döwletgeldiýew,
Türkmen oba hojalyk institutynyň 3-nji ýyl talyby. TKA-nyň talyp hakynyň eýesi.