Biz gündelik durmuşymyzda dürli häsiýetli, biri-birinden tapawutly ençeme adamlar bilen aragatnaşyk saklaýarys, her dürli adamlara gabat gelýäris. Daş-töweregimizi gurşap alýan dünýämiz biziň ynanýan, söýýän, hormat goýup ezizleýän adamlarymyz hem zatlarymyz bilen has-da gözel görünýär, has-da owadanlaşýar. Ynsan mydama öz begenjini, gam-gussasyny özüne şeýle ýakyn saýýan adamlary bilen deň paýlaşýar. Islendik ynsan şeýle adamlaryň ýanynda bolsa, özüni mydama arkaýyn duýýar. Adam haçan-da garşysyndaky ynsana ynam bildirse, onuň bilen dostluga, ýakynlyga ymtylýar. Hakyky dostluk hemişe adamlaryň biri-birine bolan ynamy netijesinde binýat bolýar. Eger ynam bolmasa, ol hakyky ýa-da müdimilik däldir.

Maşgalada ata-ene bilen çaganyň, iş durmuşynda ýolbaşçy bilen işgäriň, arasynda ynam bolmasa, ol ýerde agzybirlik, öňegidişlik höküm sürmeýär. Maşgala bu kiçijik döwlet bolup, onda ynam diýlen närse hökman bolmaly. Birek-birege bolan berk ynamy özünde jemleýän şeýle maşgalada hemişe arzuwlar wysal bolup, maşgalany üýtgeşik mähir gurşap alýar. Netijede jemgyýetde sagdyn ruhly, sagdyn dünýägaraýyşly, sagdyn pikirli ynsanlar kemala gelýär. 

Aslynda ynamy nähili gazanmaly? 

Eger, adamda töweregindäkilere ýagşylyk, sözüne ygrarlylyk, pespällik, wepalylyk, dogruçyllyk, sabyrlylyk ýaly oňat häsiýetler jemlenen bolsa, onda ol ynsan ynam duýgusyna baýdyr. Ynamdar bolmagyň esasy şerti hem adamlar bilen erkin gürrüňdeş bolmagy, derdiňi paýlaşyp bilmegi başarmakdyr. Içki pikirlerimizi paýlaşmaklyk birek-birege bolan ynamy has-da güýçlendirýär. Bir adamyň başga birine bil baglamagy, oňa ynam etmegi belli bir derejede wagty hem talap edýär. Wagt ähli derdiň dermany. Wagt ynamy kemala getirýär, ony berkidýär. Birek-birege bolan ynamyň güýçlenmegi bolsa, ýakyn hem ebedi gatnaşyklara giň ýol açyp, ynsany agzybirlige we birek-birege ynanyşmaga çagyrýar. Alçaklyk, göwnaçyklyk, pespällik durmuşda ähli ýerde zerur häsiýetler bolup, olar ynam uçgunlarynyň emele gelmegine esas bolýar. Bu bolsa belent adamkärçilikden nyşandyr.

Birek-birege bolan ynamy berkitmek, dünýämizi ýagşylyklara beslemek, hemişe agzybirlikde, dostanalykda ýaşamak bagtly durmuşymyzyň ýaraşygydyr. Çünki ynsany ynam ýaşadýandyr! 

Maral HYDYROWA,

Türkmen oba hojalyk institutynyň 2-nji ýyl talyby.