«Magtymguly – geçmişimiz, şu günümiz we geljegimizdir» atly ylmy-amaly maslahatyň açylyş dabarasy Magtymguly Pyragy muzeýine aýlanyp, bu ýerdäki gymmatlyklar, şol sanda ýaş senetkärleriň döreden işleri bilen tanyşmakdan başlady.

Ylmy-amaly maslahatyň açylyş dabarasyny Türkmenistanyň Magtymguly adyndaky Ýaşlar guramasynyň Merkezi Geňeşiniň Guramaçylyk bölüminiň müdiri G.Muhammedow alyp bardy.

Şeýle-de maslahatyň umumy mejlisi geçirilip, onda Türkmenistanyň Halk ýazyjysy O.Annaýew, «Dünýä edebiýaty» žurnalynyň baş redaktory R.Gylyjow, Türkmenistanyň Magtymguly adyndaky Ýaşlar guramasynyň Merkezi Geňeşiniň başlygy, Mejlisiň deputaty Ý.Keriýew, Türkmenistanyň Ylymlar akademiýasynyň Magtymguly adyndaky Dil, edebiýat we milli golýazmalar institutynyň esasy ylmy işgäri T.Täçmämmedowa, Berdimuhammet Annaýew adyndaky Arkadag şäher mugallymçylyk orta hünär okuw mekdebiniň direktory A.Babaýewa, «Biznes reklama» gazetiniň baş redaktory S.Geldiýew, Magtymguly adyndaky Türkmen döwlet uniwersitetiniň mugallymy L.Aşyrowa, «Türkmenaragatnaşyk» agentliginiň Işgärler we ýörite işler bölüminiň baş hünärmeni G.Gurbanowa hem-de Magtymguly adyndaky Türkmen döwlet uniwersitetiniň 4-nji ýyl talyby M.Mahtumow dagylar çykyş etdiler.

Gahryman Arkadagymyzyň, Arkadagly Gahryman Serdarymyzyň alypbarýan syýasaty netijesinde sarpasy belent tutulýan Magtymguly Pyragynyň şygyrlarynyň türkmen halkynyň ýaş nesilleri üçin durmuş ýörelgesine öwrülendigini aýratyn belläp geçdiler.

Maslahata gatnaşyjylara «Magtymguly – geçmişimiz, şu günümiz we geljegimizdir» atly ylmy-amaly maslahatyň nutuklarynyň beýany ýerleşdirilen kitapça we ýadygärlik sowgatlar gowşuryldy.