Ykdysady diplomatiýa häzirki wagtda dünýä döwletleriniň ösüşinde möhüm orny eýeleýär. Ýurtlaryň arasyndaky ykdysady gatnaşyklaryň ösdürilmegi, täze bazarlaryň tapylmagy we özara hyzmatdaşlyk ykdysady diplomatiýanyň esasy maksadydyr. Türkmenistan, dünýäniň beýleki ýurtlary ýaly, öz ykdysady kuwwatyny artdyrmak we halkara arenada öz bähbitlerini goramak üçin ykdysady diplomatiýanyň mümkinçiliklerinden netijeli peýdalanýar. Türkmenistan, baý tebigy resurslary we strategiki ýerleşişi bilen ykdysady diplomatiýanyň täsirli usullaryny ulanyp, ykdysady taýdan ösüşe ymtylýar.

Türkmenistanyň daşary syýasat strategiýasy "Açyk gapylar" ýörelgesine esaslanýar. Bu ýörelge ýurduň özara ykdysady gatnaşyklary ösdürmek, halkara maýa goýumlaryny çekmek we goňşy ýurtlar bilen hyzmatdaşlygy giňeltmek ugrundaky tagallalaryny öz içine alýar. Türkmenistan, esasan, energiýa resurslaryny daşary ýurtlara eksport etmek bilen ykdysady diplomatiýanyň täsirli usullaryny ulanýar. Ýurduň häzirki wagtda tebigy gaz, nebit we elektroenergiýa eksporty boýunça Aziýa ýurtlary, şol sanda Hytaý, Hindistan we Pakistan bilen özara peýdaly şertnamalary bar. Türkmen gazyny Günorta Aziýa we Eýran ýaly ýurtlara eltmek maksady bilen gurlan gaz geçirijiler we beýleki energetika taslamalary ykdysady diplomatiýanyň möhüm netijeleriniň biridir.Türkmenistanyň ykdysady diplomatiýa strategiýasynyň bir bölegi hökmünde, Aziýa sebitindäki ýurtlar bilen hyzmatdaşlygyny giňeltmek üçin halkara transport geçelgeleri döredilýär. Bu ugurda türkmen hökümeti demir ýol, awtoulag we deňiz ulag serişdelerini ösdürmek bilen, Eýrana, Gazagystana we Orta Aziýa ýurtlaryna täze ulag geçelgelerini açýar. Bu taslamalar ýurduň söwda ulgamynyň durnuklylygyny üpjün etmekde we täze bazarlara çykmakda möhüm orun eýeleýär.

Geljekde Türkmenistan, sanly ykdysadyýeti ösdürmek, daşary ýurt maýa goýumlaryny çekmek we innowasiýalary ornaşdyrmak boýunça strategiýasyny kämilleşdirmek arkaly ykdysady diplomatiýanyň täsirini artdyryp biler. Sanly ykdysadyýetiň ösmegi bilen ýurtlar arasyndaky gatnaşyklaryň täze görnüşleri emele gelýär we Türkmenistanda bu ugurda düýpli işleriň alnyp barylmagy ykdysady diplomatiýanyň geljegini üýtgedip biler. Şeýle hem, ykdysady diplomatiýa Türkmenistan üçin täze bazarlara we iş mümkinçiliklerine çykmak üçin uly mümkinçilikleri açýar.

Türkmenistan energiýa baýlyklaryna eýe bolmak bilen diňe bir goňşy ýurtlar bilen däl-de, eýsem Ýewropa we Aziýa döwletleri bilen hem hyzmatdaşlygy ösdürmek, Günbatar we Günorta Aziýa ýurtlary bilen tebigy gaz söwdasyny ösdürmek, şeýle hem ulag-logistika pudagynda özara peýdaly şertnamalary baglaşmak arkaly Türkmenistan täze halkara bazarlara çykmak isleýär. Şeýle hem, oba hojalygy, himiýa senagaty we senagat önümçiligi ýaly pudaklarda täze maýa goýum taslamalaryny çekmek üçin ykdysady diplomatiýanyň mümkinçiliginden netijeli peýdalanmak göz öňünde tutulýar. Bu ugurda, daşary ýurt maýadarlarynyň ýurda çekilmegi, Türkmenistanda tehnologik taýdan ösen önümçilik ulgamlarynyň we iş orunlarynyň artmagyna ýardam berer.

Türkmenistan özüniň baý tebigy baýlyklaryna we strategiki ýerleşişine esaslanyp, dünýä döwletleri bilen özara bähbitli ykdysady diplomatiýa alyp barýar. Türkmenistanyň ykdysady diplomatiýa strategiýasy, onuň içerki ösüşine we halkara bähbitlerine uly goşant goşýar. Geljekde sanly ykdysadyýetiň ösmegi, energiýa howpsuzlygy we ekologiýa bilen baglanyşykly meseleler Türkmenistanyň ykdysady diplomatiýa ugruny ösdürmäge mümkinçilik döreder. Netijede, ykdysady diplomatiýa, ýurduň durnukly ösüşini üpjün edip, geljekde onuň dünýä bilen gatnaşyklaryny has-da pugtalandyrar.

Gyzylgül GURBANMUHAMMEDOWA,
Türkmenistanyň Daşary işler ministrliginiň
Halkara gatnaşyklary institutynyň mugallymy.