Ýurdumyzyň Bäherden etrabynyň daglyk ýerlerinde ýaýran ýalaňaç tohumly ösümlikleriň biri hem ýabany arçadyr. Ol gurakçylyga çydamly ösümlikdir. Arça agajynyň ýabany ösýän görnüşleri Köpetdagda we uly Balkanda duş gelýär. Miwesinde efir ýagy, sirke we garynja kislotalary bar. Miwesinden we gök pudajygyndan alynýan ýakymly ysly efir ýagy lukmançylykda inçekeseli, böwrek keselini bejermekde we ýaralara çalynýan melhem taýýarlamakda peýdalanylýar. Özünden bölüp çykarýan uçujy fitansid maddalary bilen howany zyýanly mikroorganizmlerden arassalaýar. Arçanyň ýabany ösýän görnüşleri dag eňňitleriniň yzgarlylygyny saklamaga kömek edýär. Ol uzak ýaşaýan agaçdyr. Müň ýyldan hem uzak ýaşaýan ýabany arça agajyna duşmak bolýar. Dagyň aşaky eňňitlerinde arça agaçlary az duş gelýär. Olar örän haýal ösýär we kynlyk bilen köpelýär. Şol sebäpli ýabany arçalary aýawly saklamak möhümdir. Bu gymmatly agaçlar Türkmenistanyň tokaý hojalyklarynda ekilýär we köpeldilýär.