14–16-njy noýabr aralygynda Aşgabatda geçiriljek XVII halkara sergi we «Türkmentel-2024» ylmy konferensiýasy, maglumat tehnologiýalary pudagyndaky iň uly halkara çärelere öwrüler. Bu çäre, dünýäniň öňdebaryjy hünärmenlerini, programma üpjünçiligini öndürijileri we telekommunikasiýa enjamlarynyň öndürijilerini birleşdirer we tejribe alyşmak üçin möhüm bir meýdança bolar.

Çäräniň esasy ugurlary we bölümleri şulardan ybarat bolar:

- Innowasiýa sergisi: Sergide sanly ykdysadyýet, kiberhowpsuzlyk, hemra aragatnaşygy we 5G ulgamlaryndaky täze ösüşler tanyşdyrylar.
- Tejribe alyşmak: Forumda, telekommunikasiýa, sanly üýtgeşmeler we kiberhowpsuzlyk ugurlaryndaky möhüm meseleler ara alnyp maslahatlaşylar.
- Okuw maksatnamalary: Maslahatda poçta ulgamyny sanlylaşdyrmak ýaly möhüm temalar boýunça seminarlar geçiriler.
- Innowasiýa taslamalarynyň bäsleşigi: IT hünärmenleri öz taslamalaryny görkezip, gymmatly baýraklar üçin bäsleşerler.

Bu çärede 150-den gowrak programma üpjünçiligini öndürýän kompaniýalar we «Amazon Project Kuiper», «SpaceX», «Ozon Marketpleýs Kazakhstan», «Dell Technologies», «EUROPEAN NETWORKS», «Eastwind», «Huawei Tech. Investment Co., LTD», «Samsung» ýaly dünýä belli kompaniýalar gatnaşar. Çärä gatnaşyjylaryň geografiýasy ABŞ-dan Ýewropanyň, Aziýanyň we Ýakyn Gündogaryň birnäçe döwletini öz içine alýar.

«Türkmentel-2024» Türkmenistanyň sanly ykdysadyýetde ösen döwlet hökmünde tanalmagyna we bu ugurda maýa goýumlaryny çekmäge uly mümkinçilik döreder. Şeýle hem, forumda türkmen we daşary ýurtly hünärmenleriň arasyndaky hyzmatdaşlygy ösdürmek üçin täze ýollar açylar.

Bu halkara sergi we ylmy konferensiýa, Türkmenistanyň we sebitiň sanly jemgyýetini ösdürmekde täze mümkinçilikleri dünýä aňsatlyk bilen açar.

Azat GAÝYRHOJAÝEW,
Türkmenistanyň Döwlet energetika institutynyň
talyby.