Ýakynda «Sagdynlyk we bagtyýarlyk» atly köpçülikleýin bedenterbiýe-sport we sagdyn durmuş-medeni çäreleriniň biraýlygynyň çäginde Türkmenistanyň Kärdeşler arkalaşygynyň Tejen etrap birleşmesiniň hem-de Türkmenistanyň Zenanlar birleşiginiň Ahal welaýatynyň Tejen etrap bölüminiň bilelikde gurnamagynda «Sagdyn zenan-bagtyýar maşgalanyň gözbaşydyr» atly şygar astynda Tejen etrabynyň Altyn asyr şäherindäki sport mekdebinde etrabyň sport mekdebiniň toparlary hem-de orta mekdeplerde bilim alýan 10-11-nji synp okuwçy gyzlaryň arasynda sportuň woleýbol görnüşi boýunça ýaryş geçirildi.

Ýaryşda orta mekdeplerde bilim alýan gyzlardan düzülen toparlar öz aralarynda bäsleşdiler. Gyzgalaňly hem-de çekeleşikli ýagdaýda geçen ýaryş ökdeleri öňe saýlady. Emin agzalaryň adalatly baha bermeginde ýaryşyň ýeňijileri saýlandy. Netijede Tejen etrabynyň Sport we ýaşlar syýasaty bölüminiň topary 1-nji orna,  etrabyň 42-nji orta mekdebiň topary 2-nji orna, etrabyň 8-nji orta mekdebiniň topary 3-nji orna mynasyp boldular.

Ýaryşyň ahyrynda ýeňiji bolan toparlara bäsleşigi gurnaýjylar tarapyndan ýadygärlik sowgatlary dabaraly ýagdaýda gowşuryldy. 

Maral AKYÝEWA,

Türkmenistanyň Kärdeşler arkalaşyklarynyň 
Ahal welaýatynyň Tejen etrap 
birleşmesiniň esasy hünärmeni,
Zenanlar guramasynyň işjeň agzasy.