«Türkmenistanyň gurluşygy, senagaty we energetikasy – 2024» atly halkara sergi we «Türkmenistanyň gurluşyk, senagat, energetika pudaklarynyň ösüşi» atly maslahat, ýurdumyzda bolup geçýän çylşyrymly özgerişleriň möhüm ugurlaryny görkezdi. Telekeçilik we bilim pudaklary, halk hojalygynyň ösüşinde möhüm orun eýeleýär. Türkmenistanyň bilim ministriniň orunbasary Azat Ataýew, uniwersitetlerde talyplaryň we ýaş alymlaryň ylmy ösüşlerini iş ýüzünde ulanmaga kömek etjek telekeçilik ugruny ornaşdyrmagyň zerurlygyny nygtady. Bu barada Türkmenistanyň resmi metbugaty habar berýär.

Mundan başga-da, ýurdumyzda Senagatçylar we telekeçiler birleşiginiň täze ýokary okuw mekdebini döretmek ýaly telekeçilik ugrunda hünärmenleri taýýarlamak boýunça uly işler alnyp barylýar. Bu taslama, «Nur bina gurluşyk» hususy kärhanasy tarapyndan durmuşa geçirilýär. Kompaniýanyň wekili Wepa Melebaýew, gurluşyk işleriniň 50%-iniň tamamlandygyny we işleriň meýilnama laýyklykda dowam etdirilýändigini aýtdy. Täze mekdebiň 2025-nji ýylyň sentýabr aýyna çenli ulanylmaga berilmegi göz öňünde tutulýar. Täze ýokary okuw mekdebi, 2700 talyba hyzmat etmäge niýetlenen köpugurly talyp şäherçesini öz içine alar.

Mekdepde alty fakultet, kitaphana, maslahat otagy, giň naharhana, talyplaryň ýaşaýyş jaýy, sport meýdançalary we awtoulag duralgasy ýaly desgalaryň bolmagy meýilleşdirilýär. Häzirki wagtda ýurduň dürli ýerlerinde biznes ugrunda okuw berýän mekdepler bar.

2025-nji ýylda açyljak täze ýokary okuw mekdebi, telekeçilik we işewürlik pudagynda ýokary hünärli okuwlary hödürlär we ýaşlarymyzyň geljegi üçin möhüm ädim bolar. Bu täze bilim jaýy, innowasiýa we ykdysady ösüşiň hereketlendiriji güýjüne öwrülip, hünärmenler üçin giň we netijeli okuw mümkinçiliklerini üpjün eder.

Enejan SULTANOWA,
Türkmenistanyň Döwlet energetika institutynyň
talyby.