Aşgabat şäheriniň iňlis dili çuňlaşdyrylyp öwredilýän ýöriteleşdirilen 135-nji orta mekdebiniň okuwçylary XXII Halkara Žautykow olimpiadasynda gazanan üstünlikleri üçin dabaraly ýagdaýda sylaglandy. Ýurdumyzyň zehinli mekdep okuwçylaryna Türkmenistanyň Magtymguly adyndaky Ýaşlar guramasynyň Merkezi Geňeşiniň gymmat bahaly sowgatlary gowşuryldy. Bu barada Türkmenistanyň Bilim ministrliginiň web sahypasy habar berýär.

Ýurdumyzyň okuwçylary bu abraýly halkara bäsleşiginde 1 sany altyn, 4 sany kümüş we 11 sany bürünç medala eýe boldular. Bu üstünlikler Hormatly Prezidentimiziň ýaş nesil baradaky yzygiderli aladalarynyň we watansöýüji, intellektual hem-de ruhy taýdan ösen ýaşlary kemala getirmek ugrunda alyp barýan tagallalarynyň aýdyň görkezijisidir. Şeýle üstünlikler «Garaşsyz, baky Bitarap Türkmenistan ─ bedew batly at-myradyň mekany» ýylynda gazanylan ilkinji anyk netijeleridir.

Halkara Žautykow olimpiadasy 2005-nji ýyldan bäri Gazagystanyň Magaryf ministrliginiň “Daryn” ylmy-amaly merkeziniň guramagynda geçirilýär. Ol her ýyl fizika, matematika we informatika derslerinden geçirilip, halkara derejesine eýedir. Olimpiadanyň esasy maksady mekdep okuwçylarynyň arasynda bu ugurlary giňden öwretmek, dürli ýurtlaryň ýöriteleşdirilen orta mekdepleriniň arasynda dostlukly gatnaşyklary ösdürmek we ylmy tejribe alyşmakdan ybaratdyr.

Türkmenistanyň mekdep okuwçylary bu olimpiadada 2010-njy ýyldan bäri yzygiderli gatnaşýarlar we ýyl-ýyldan gazanýan üstünlikleri artýar. 2026-njy ýylyň 10-14-nji ýanwary aralygynda Gazagystanyň Almaty şäherinde geçirilen XXII Halkara Žautykow olimpiadasyna ýurdumyzdaky 28 zehinli okuwçy gatnaşdy. Olimpiadada jemi 16 döwletiň 600-den gowrak okuwçysy bäsleşdi, we Türkmenistanyň ýaşlary üstünlikli çykyş etdi.

Didarmuhammet MELEJÄÝEW,
 
Türkmenistanyň Döwlet energetika
institutynyň mugallymy.