Dünýä giňişliginde medeni, ylmy we ynsanperwerlik gymmatlyklaryny häzirkizaman galkynyşy ruhunda ilerletmekde, halkara dialogyny berkitmekde aýratyn hyzmatlary bitiren Türkmenistanyň halk suratkeşi, Türkmenistanyň Hormatly il ýaşulusy, Türkmenistanyň Döwlet çeperçilik akademiýasynyň Hormatly doktory, Türkmenistanyň Döwlet çeperçilik akademiýasynyň heýkeltaraşlyk kafedrasynyň uly mugallymy, heýkeltaraş Babasary Annamyradowdyr.

Häzirki wagtda Türkmenistan ýurdumyz dünýä we goňşy döwletleri bilen özara medeni gatnaşyklaryny yzygiderli saklap gelýär. 2025-nji ýylyň 15-nji noýabrynda Özbegistan Respublikasynyň Daşkent şäherinde geçirilen Merkezi Aziýa döwletleriniň Döwlet Baştutanlarynyň Konsultatiw duşuşygynyň çäklerinde Türkmenistanyň halk suratkeşi Babasary Annamyradowyň «Geljegiň mirasy» halkara baýragyna mynasyp bolmagy onuň aýdyň mysalydyr.

Özbegistan Respublikasynyň Prezidentiniň Karary bilen esaslandyrylan bu halkara baýrak edebiýat, medeniýet, sungat, ylym, bilim hem-de sanly tehnologiýalar ulgamlarynda uly üstünlik gazanan ýerli we daşary ýurtly döredijilik işgärlerini höweslendirmäge gönükdirilendir. Baýragy gowşurmak dabarasy Daşkent şäherindäki Yslam medeniýetiniň merkezinde Özbegistanyň, Azerbaýjanyň, Gazagystanyň, Gyrgyz Respublikasynyň we Täjigistanyň Prezidentleriniň gatnaşmagynda geçirildi.

Ynsanperwer taglymatlary öňe sürmekde, dünýä halklary jebisleşdirmekde halypa, Türkmenistanyň halk suratkeşi Babasary Annamyradowyň baý tejribesi we ussatlygy, özboluşly zehini, köpýyllyk döredijilik zähmeti, ylmy-döredijilik hem-de çeperçilik-estetiki, intellektual güýjüni göz öňüne tutup, oňa Özbegistan Respublikasynyň Hökümeti tarapyndan döredilen «Geljegiň mirasy» halkara baýragy gowşuryldy.

Babasary Annamyradowyň döredijilik ýolunyň dowamynda döredilen monumental taslamalary türkmen halkynyň beýik şahsyýetleriniň taryhyny we keşplerini şöhlelendirip, Türkmenistanyň, aýratyn hem Aşgabat şäheriniň ak mermerli keşbi bilen sazlaşykly utgaşýar we ýaşlarda watansöýüjilik duýgusyny artdyrmaga uly ýardam berýär. Halkyň ahlak dünýägaraýşyny açyp görkezýän stanok heýkelleri we grafika sungaty suratkeşiň döredijiliginde esasy orny eýeleýär. Suratkeşiň şekillendiriş medeniýeti rus we dünýä heýkeltaraşlygynyň nusgalary esasynda kämilleşip, modern we realizm sungatynyň  dürli çeperçilik akymlarynyň we stilleriniň esaslaryny şöhlelendirýär. Babasary Annamyradowyň eserleri halkyň durmuşy bilen ýakyndan baglanyşykly ägirt uly jemgyýetçilik we estetiki ähmiýetine eýedir.

Türkmenistanyň görnükli ussady türkmen halkynyň taryhyndan we gündelik durmuşyndan ylham alyp, türkmen sungatynyň bütin dünýäde ýaýramagyna möhüm goşant goşdy we döwlet hem-de halkara derejesindäki köp sanly baýraklara, hormatly atlara, medallara mynasyp boldy. Babasary Annamyradowyň döredijilik zehini ykrar edilip, ol köp sanly bäsleşikleriň ýeňijisi hem bolýar.

Babasary Annamyradowyň döredijilik mirasyny şöhlelendirýän Watanymyzda we dünýä ýurtlarynda geçirilen şahsy sergileri, Russiýanyň Suratkeşler birleşigi tarapyndan A.S.Puşkiniň doglan gününiň 200 ýyllygyna bagyşlanan altyn medalyna, Russiýanyň çeperçilik akademiýasynyň hormatly agzasynyň eýe bolmagy heýkeltaraşyň ussatlagyny ýene-de bir gezek ony ykrar edýär.

Şu ýylyň oktýabr aýynda Babasary Annamyradowyň Türkmenistanyň hemişelik Bitaraplygynyň 30 ýyllygyna bagyşlanyp suratkeşiň nakgaş, heýkel, grafiki, halyçylyk, külalçylyk eserlerden toplanan şahsy galereýasynyň açylmagy dünýä medeniýetiniň hazynasynda türkmen sungatyny şöhlelendirýän baýramçylyk sowgadyna öwrüldi. Galereýanyň ýygyndysynda türkmen halkynyň çeperçilik mirasyny görkezýän şekillendiriş we amaly-haşam sungatynyň naýbaşy nusgalary jemlenip, geljekki nesillere miras bolup galmagy uly ähmiýete eýedir.

Türkmenistanyň halk suratkeşi Babasary Annamyradowyň eserleri Aşgabat, Mary, Daşoguz şäherindäki, Türkmenistanyň Şekillendiriş sungaty muzeýiniň, şeýle hem Moskwadaky Döwlet Tretýakow galereýasynda we Gündogar halklarynyň sungat muzeýinde, Polşadaky, Argentinadaky, Amerikanyň Birleşen Ştatlaryndaky, Şwesiýadaky, Türkiýe Respublikasyndaky, Russiýa Federasiýasyndaky ýygyndylarynda türkmen sungatyny mynasyp görkezýär.

Türkmenistanyň halk suratkeşi Babasary Annamyradowy Özbegistan Respublikasynyň Hökümeti tarapyndan döredilen «Geljegiň mirasy» halkara baýragyň eýesi bolandygy bilen tüýs ýürekden gutlaýarys!

Aýjan Kadyrowa,
Türkmenistanyň Döwlet çeperçilik akademiýasynyň
sungaty öwreniş kafedrasynyň mugallymy.