3-nji noýabrda – Türkmenistanyň resmi metbugatynyň habaryna görä, Türkmenistanda iki sany täze elektrik bekedi işe girizildi. Balkan welaýatynyň Etrek etrabynda ýerleşýän we güýjenmesi 220 kilowat bolan “Etrek” elektrik bekedi, şeýle hem Aşgabat şäherinde 110 kilowat güýjenmesi bilen işleýän “Bagyr” elektrik bekedi açylyp, ulanmaga tabşyryldy.

Bu täze beketler döwrebap tehnologiýalar bilen enjamlaşdyrylyp, dünýäniň öňdebaryjy kompaniýalarynyň önümçilik enjamlary bilen üpjün edilendir. Desgalaryň gurluşygynda ekologiýa talaplaryna we energiýa tygşytlaýjy tehnologiýalaryň ornaşdyrylmagyna aýratyn üns berildi, bu hem olaryň Türkmenistanyň energiýa bazaryna goşmaça kuwwat hödürleýändigini görkezýär.

Türkmenistanyň Energetika ministrliginiň wekilleriniň bellemegine görä, täze beketleriň ulanmaga berilmegi ýurduň içerki energiýa üpjünçiligini güýçlendirip, eksport mümkinçiliklerini artdyrar. Bu desgalar içerki islegleri doly kanagatlandyrmak bilen çäklenmän, elektrik energiýasynyň goňşy ýurtlara eksportyny hem ösdürmäge mümkinçilik berer. Hususan-da, “Etrek” elektrik bekediniň işe girizilmegi goňşy ýurtlara energiýa akymyny gowulandyrmakda möhüm ädimdir.

Elektrik beketleriniň açylyş dabarasyna ýurdumyzyň Mejlisiň deputatlary, welaýat we etrap häkimlikleriniň, jemgyýetçilik guramalarynyň ýolbaşçylary we energiýa pudagynyň işgärleri gatnaşdylar. Bu çäre, Türkmenistanyň ykdysady strategiýasynyň energetika pudagynda häzirki zaman tehnologiýalaryny ulanyp, ýurduň ykdysady kuwwatyny we halkara hyzmatdaşlygyny pugtalandyrmaga gönükdirilendigini ýene bir gezek görkezdi.

Allamyrat Gapurow,
Magtymguly adyndaky Türkmen 
döwlet uniwersitetiniň Ekologiýa
hünäriniň 3-nji ýyl talyby.