Türkmenistanda Koreýa Respublikasynyň Ilçisiniň 12-nji Taekwondo kubogy üstünlikli geçirildi, bu çäre ýurduň sport durmuşynda möhüm wakalaryň biri boldy. Aşgabat şäherinde geçirilen ýaryşa ýurduň dürli sebitlerinden jemi 178 türgen gatnaşdy.

Mälim bolşy ýaly, Mary welaýaty, Daşoguz welaýaty, Lebap welaýaty we Aşgabat şäheri ýaly sebitlerden gelen türgenler ýokary ussatlyklary, jogapkärçilikli çykyşlary bilen tapawutlandylar. Ýaryşlar adalatly we dostlukly ýagdaýda geçirildi, bu bolsa türgenleriň we olaryň tälimçileriniň tagallasynyň we yhlasynyň netijesidir.

Ýaryşyň netijeleri boýunça:
- Aşgabat şäheri 19 sany 1-nji orun;
- Mary welaýaty 11 sany 1-nji orun;
- Daşoguz welaýaty 1 sany 1-nji oruna mynasyp boldy.

Bu ýaryşda aýratyn tapawutlanan topar Magtymguly adyndaky Türkmen döwlet uniwersitetiniň 5-nji ýyl talyby Toýly Amangeldiýewiň tälimçiligindäki Aşgabat şäheriniň türgenleri boldy. Ýaryşa üstünlikli gatnaşan ähli türgenlere Koreýa Respublikasynyň Ilçihanasynyň ilçisi tarapyndan  kubok we sowgatlar gowşuryldy.

Koreýa Respublikasynyň Ilçisiniň taekwondo kubogy, häzirki wagtda 12-nji gezek geçirilýär, bu ýaryş Türkmenistandaky sport senenamasynda möhüm orna eýe bolup, Türkmenistany Koreýa Respublikasy bilen medeni we sport ugurlarynda has-da ýakynlaşdyrdy.

Bu ýylky ýaryş diňe bir türgenleriň üstünliklerini belläp geçmek bilen çäklenmän, eýsem, taekwondo göreşiniň rowaçlanmagyna itergi berip, Türkmenistan bilen Koreýanyň arasyndaky dostluk gatnaşyklarynyň pugtalandyrylmagyna öz goşandyny goşdy.