Türkmenistanda kiberhowpsuzlyk innowasiýalaryny ösdürmek üçin "Turkmen Cyber. Hack" hakaton bäsleşigi geçirilýär

Berkarar döwletiň täze eýýamynyň Galkynyşy döwründe Hormatly Prezidentimiziň ýolbaşçylygynda Türkmenistan ägirt uly ösüşlere we özgertmelere tarap öňe barýar. Bu ösüşlerde ýurdumyzyň bilim ulgamynyň döwrebaplaşdyrylmagy örän uly ähmiýete eýedir.

Hünär biliminiň esasy maksady jemgyýete peýdaly, işjeň, ýokary derejeli hünärmenleri taýýarlamakdan ybaratdyr. Şeýle hünärmenleri taýýarlamakda önümçilik okuwynyň oňyn netije bermegi, hünär ussatlygynyň kemala gelmegi, zähmet endikleriniň we zähmet medeniýetiniň emele gelmegi örän möhümdir. Häzirki zaman kompýuter ulgamlarynyň giňden ulanylmagy we dürli enjamlar arkaly aragatnaşygyň üpjün edilmegi döwlet we hususy edaralar üçin uly gowşaklyklary we howplary döredýär. Bu gowşaklyklaryň ulanylmagy milli howpsuzlyga zyýanly täsir edip biler.

Kiberhüjümleriň tebigatyny düýpli öwrenmek we seljermek esasynda, kiberhowpsuzlygy üpjün etmek üçin hüjümleri irki tapgyrlarda anyklamak we öňüni almak zerurdyr. Şu meseleleri çözmek maksady bilen, Türkmenistan "Turkmen Cyber. Hack" atly hakaton bäsleşigini geçirýär. Bu bäsleşik kiberhowpsuzlyk boýunça täze çözgütleriň döredilmegine ýardam bermäge gönükdirilendir.

Hakatonyň maksatlary:

1. Gatnaşyjylaryň hünär taýýarlygyny ýokarlandyrmak.
2. Döredijilik başarnyklaryny ösdürmek.
3. Geljekdäki kärine söýgi oýarmak.
4. Dürli maksatlara niýetlenen programma üpjünçiligini döretmek.
5. Toparlaýyn iş we mesele çözmek ukyplaryny kämilleşdirmek.
6. Kiberhowplary ýüze çykarmak we olara garşy göreşmek boýunça bilim bermek.

Bäsleşik boýunça gysgaça maglumat:

Bäsleşikde orta we ýokary okuw mekdepleriniň talyplary, şeýle-de dürli ministrlikleriň we pudak edaralarynyň ýaşlar toparlary gatnaşyp bilerler. Toparlar 5 agzadan ybarat bolup, her bir topar operasion ulgamlarda gizlin howplary anyklamak we olary ýok etmek boýunça programma üpjünçiligi işläp düzmeli.

Gatnaşyjylar bäsleşige göni ýa-da aralykdan gatnaşyp bilerler. Aralykdan gatnaşýan toparlar öz programmalaryny we ulanyş görkezmelerini eminler toparyna ibermeli, olar synag ulgamlarynda barlanar.

Bahalandyrma ölçegleri:

Eminler topary toparyň:

• Gizlin kiberhowplary ýüze çykaryş ukyby.
• Kiberhüjümlerden soň ulgamy dikeltmek başarjaňlygy.
• Hüjümleri aradan aýyrmak üçin minimal serişdeleri peýdalanmagy.
• Hüjümleri awtomatiki anyklap we ýok edip bilýän programma üpjünçiligini döretmegi ýaly ugurlary göz öňünde tutup baha bererler.

Ýeňijiler Hormat hatlary bilen sylaglanar, hem-de iň gowy toparlar aýratyn sylaglara mynasyp bolar.

Ýazgylar üçin maglumat:

Gyzyklanýan toparlar 2024-nji ýylyň 20-nji oktýabryna çenli cmaksat@gmail.com salgysyna toparyň sanawyny ibermeli. Her okuw mekdebinden diňe bir topar gatnaşyp biler.

Bu hakaton, Türkmenistanyň ýaş hünärmenleriniň kiberhowpsuzlyk ukyplaryny görkezip, ýurduň kiber goragyna goşant goşmak üçin ajaýyp mümkinçilikdir.

Çeşme: education.gov.tm/competition-details/33

Mahym BERDIÝEWA
Ýagşygeldi Kakaýew adyndaky Halkara Nebit we gaz uniwersitetiniň I ýyl talyby