Arkadag şäheri diňe bir ajaýyp tebigaty bilen däl, eýsem, innowasion çözgütleriň hem-de döwrebap ykdysady taslamalaryň merkezi hökmünde tapawutlanýar. Şäheriň çägindäki arassa dag çeşmelerinden başlap, bu ýerde öndürilýän derman serişdelerine çenli ähli mümkinçilikler adam saglygyna we ýurdumyzyň ykdysady ösüşine hyzmat edýär. Ekologiýa taýdan arassa çig maldan taýýarlanylýan ýokary hilli saglyk önümleri, milli ykdysadyýetiň kuwwatyny artdyrmak bilen bir hatarda, ýurdumyzyň dünýä bazarynda öz ornuny pugtalandyrmagyna hem ýardam edýär.


Lukmançylyk klasterleriniň döredilmegi häzirki zaman saglygy goraýyş we ykdysady ösüş üçin örän möhüm hasaplanylýar. Arkadag şäherinde döredilýän bu klaster, ýurdumyzyň saglygy goraýyş ulgamyny has-da ösdürmek, halkara ülňülere laýyk gelýän saglyk önümlerini öndürmek we dünýä bazaryna çykmak üçin täze mümkinçilikleri üpjün edýär. Lukmançylyk klasteri diňe bir hassahanalar toplumy däl-de, eýsem, derman serişdelerini we lukmançylyk enjamlaryny öndürmek bilen bagly ylmy-barlag we tejribe işlerini öz içine alýan toplumlaýyn çözgütdir.


Arkadag şäherinde lukmançylyk klasteriniň taslamasy Germaniýanyň «Goetzpartners Emerging Markets GmbH» kompaniýasy bilen hyzmatdaşlykda amala aşyrylýar. Taslama halkara ülňülere laýyklykda, döwrebap tehnologiýalaryň we ylmy tejribeleriň ornaşdyrylmagyny göz öňünde tutýar. Nemes kompaniýalarynyň enjamlary bilen üpjün edilen saglyk desgalary dünýäniň iň kämil tejribeleriniň ulanylýandygyny görkezýär.


Bu klasteriň çäginde öndüriljek saglyk maksatly serişdeler, şol sanda bir gezeklik ulanylýan örtükler, medisina enjamlary, şeýle hem dokalmadyk matadan taýýarlanan önümler ýokary halkara talaplaryna laýyk gelýär. Olaryň bir bölegi içerki bazaryň islegini kanagatlandyrmaga, beýleki bölegi bolsa eksport ugurlaryna gönükdirilýär.


Lukmançylyk klasteriniň möhüm aýratynlyklarynyň biri, öndürilýän önümleriň ekologiýa taýdan arassa we ýerli çig maldan taýýarlanylmagydyr. Arkadag şäheriniň tebigy baýlyklary, hususan-da Garagum sährasynyň tebigy çig mal serişdeleri, eksport ugurly harytlary öndürmekde ägirt uly mümkinçilikleri hödürleýär. Şeýlelikde, klasteriň önümleri diňe bir ýurdumyzyň ykdysady ösüşine goşant goşman, eýsem, ýerli iş orunlarynyň döredilmegine we halkyň durmuş derejesiniň ýokarlanmagyna ýardam edýär.


Arkadag şäherindäki lukmançylyk klasteri, diňe bir saglygy goraýyş ulgamynda täze tejribe bolmak bilen çäklenmän, eýsem, ýurdumyzyň ykdysady ösüşiniň täze binýadyny hem döredýär. Häzirki zaman ylmy bilen utgaşykly işlenip düzülen bu taslama, diňe bir Türkmenistanyň däl, eýsem, sebitiň saglyk we derman senagatynda hem öňdengörüji orny eýelemegini üpjün eder.

Sülgün BABAÝEWA,
Myrat Garryýew adyndaky Türkmenistanyň Döwlet
lukmançylyk uniwersitetiniň şöhle bilen anyklaýyş,
bejeriş we onkologiýa kafedrasynyň mugallymy.