11-12-nji noýabrda Aşgabat şäherinde bilermenler derejesinde halkara duşuşyk we Möhüm energetika infrastrukturasyny terrorçylykly hüjümlerden goramak boýunça tehniki gollanmanyň halkara derejesinde ilkinji tanyşdyryş maslahaty geçirildi. Çäre Türkmenistanyň Hökümeti tarapyndan Birleşen Milletler Guramasynyň Terrorçylyga garşy göreşmek müdirligi (UNOCT) we Russiýa Federasiýasynyň Hökümeti bilen bilelikde guraldy.

Iki günläp dowam eden bu çäre energetika infrastrukturasyna abanýan howplar barada habardarlygy ýokarlandyrmak, şeýle-de öňdebaryjy tejribäni ara alyp maslahatlaşmak üçin halkara hünärmenlerini çekmek maksadyny göz öňünde tutdy. Duşuşyga gatnaşyjylar möhüm energetika infrastrukturasyny goramagyň esasy ugurlaryna we halkara derejesinde özara gatnaşyklaryň işjeňleşdirilmegine ünsi çekdiler. Çykyş edenler milli derejede alnyp barylýan işleriň esasy ugurlaryny nygtadylar.

Maslahatyň dowamynda Türkmenistanyň energetika ulgamynyň halkara hyzmatdaşlykdaky roly hem bellenilip geçildi. Türkmenistan gaz, nebit we elektrik energiýasy pudaklarynda giň mümkinçilikleri bolan ýurtlaryň biri bolup, iri energetika taslamalaryna goşant goşýar. Ýurduň gaz we energiýa eksport ugurlary Orta we Günorta Aziýa, Ýewropa, Hytaý ýaly sebitlere gönükdirilendir. Bu babatda Türkmenistan halkara energiýa howpsuzlygyny üpjün etmekde möhüm orun eýeleýär.

BMG-niň Baş Assambleýasynyň 2023-nji ýylyň 19-njy dekabrynda Türkmenistanyň başlangyjy bilen kabul eden “Durnukly ösüşi üpjün etmekde ygtybarly we durnukly energiýa birikmesiniň esasy orny” atly kararnamanyň energetika kynçylyklaryny ýeňip geçmek ugrunda halkara tagallalary utgaşdyrylmagyny we energiýa serişdeleriniň serhetüsti ugradylmagynyň ygtybarlylygyny üpjün etmäge çagyrýandygy nygtaldy.

BMG-niň Duýgur maksatlary terrorçylyk howplaryndan goramak boýunça ählumumy maksatnamasy 2021-nji ýyldan bäri agza ýurtlara mümkinçilikleri artdyrmaga, bilermenleriň arasyndaky gatnaşyklary ösdürmäge we möhüm infrastrukturany goramak babatynda öňdebaryjy tejribäni kesgitlemäge ýardam berýär. Şeýle-de Aşgabatda geçirilen bu halkara çäräniň çäginde Möhüm energetika infrastrukturasyny terrorçylykly hüjümlerden goramak boýunça tehniki gollanmanyň ilkinji tanyşdyrylyşy boldy.

Akmyrat Durdyýew,
Türkmenistanyň Telekommunikasiýalar
we Informatika institutynyň III ýyl talyby.