Türkmenistan we Huawei: Sanly geljegi döretmekde hyzmatdaşlyk dowam edýär
 

Halkara “Türkmentel” sergisiniň we maslahatynyň çäklerinde, Türkmenistanyň bilim ministriniň orunbasary Azat Ataýew bilen Huawei kompaniýasynyň Ýakyn Gündogar we Merkezi Aziýa sebiti boýunça AKT çözgütleriniň marketing we satuw bölüminiň ýolbaşçysy Allen Tang duşuşdy. Duşuşykda maglumat we kommunikasiýalar tehnologiýalary (MKT) pudagy üçin ýokary derejeli hünärmenleri taýýarlamak boýunça strategik hyzmatdaşlyk meseleleri ara alnyp maslahatlaşyldy.
 

Huawei kompaniýasynyň wekili Allen Tang kompaniýanyň Türkmenistanda MKT pudagyny ösdürmekde uly mümkinçilikleri görýändigini nygtady. Onuň bellemegine görä, Huawei diňe bir telekommunikasiýa enjamlaryny üpjün etmek bilen çäklenmän, sanly özgertmeleriň innowasiýa kompaniýasy hökmünde dünýäde öňdebaryjy tehnologiýalary hem işläp taýýarlap gelýär.
 

Duşuşykda Huawei kompaniýasynyň Türkmenistanda MKT akademiýalaryny döretmek we “Smart Classroom 3.0” ýaly çözgütleri ornaşdyrmak başlangyçlaryny hödürleýändigi bellenildi. Mundan başga-da, “Seeds for the Future” atly global maksatnama arkaly talyplara emeli aň, bulut tehnologiýalary we beýleki sanly ulgamlar bilen işlemek mümkinçilikleriniň giňeldiljekdigi aýdyldy.
 

Azat Ataýew, öz gezeginde, şu ýylyň sentýabr aýynda Türkmenistanyň Bilim ministrliginiň wekiliýetiniň “Huawei Connect 2024” atly halkara sergä gatnaşandygyny we onuň çäklerinde MKT babatda möhüm ylalaşyklaryň gazanylandygyny belledi. Hususan-da, bilimde emeli aňy ulanmak ugrunda hyzmatdaşlygy giňeltmek üçin täze mümkinçilikler açyldy.
 

Bu duşuşyk, Türkmenistan bilen Huawei kompaniýasynyň bilim, tehnologiýa we innowasiýa ugurlaryndaky strategik hyzmatdaşlygynyň mundan beýläk-de pugtalanýandygyny görkezýän möhüm ädim boldy.
 

Çeşme: education.gov.tm

Süýtbike GELDIÝEWA,
Türkmenistanyň Döwlet energetika
institutynyň 3-nji ýyl talyby.