2024-nji ýylyň 30-njy sentýabryndan 1-nji oktýabry aralygynda Türkmenistanyň wekiliýeti Ženewada BMG-niň Ýewropa ykdysady komissiýasy (UNECE) tarapyndan guralan «Geljegiň şäherleri» atly şäher häkimleriniň sammitine gatnaşdy. Bu barada Türkmenistanyň daşary işler ministrliginiň web sahypasynda habar berildi.

Türkmen tarapyna Awaza etrabynyň häkimi D.Jumaýew wekilçilik etdi. D.Jumaýew çykyşynda Türkmenistanyň durnukly şäher ösüşi boýunça gazananlaryny we ilatyň ýaşaýyş derejesini ýokarlandyrmak üçin amala aşyrýan döwrebap taslamalary barada gürrüň berdi. «Akylly» Arkadag şäheriniň taslamasy, şäher meýilnamasy we durnukly ösüş pudagynda öňdebaryjy çözgütleriň ulanylmagy mysal hökmünde görkezildi. Şeýle hem, döwrebap infrastruktura eýe bolan «Awaza» milli syýahatçylyk zolagy tanyşdyryldy.

Türkmenistanyň wekiliýeti suw baýlyklaryny dolandyrmak we şäherli ýaşlaryň ösüşi boýunça halkara dialogyny başlatmagy teklip etdi. Şeýle hem, UNECE-iň howandarlygynda suw baýlyklaryny dolandyrmak üçin täze hukuk guralynyň döredilmegi we Arkadag şäherinde ýaşlar üçin halkara duşuşygynyň geçirilmegi teklip edildi.

Şamerjen Sylapowa,
Türkmenistanyň Döwlet energetika institutynyň talyby.