Arkadagly Gahryman Serdarymyzyň baştutanlygynda türkmen ýaşlarynyň bilim we zehin taýdan ösüşine giň mümkinçilikler döredilýär. Bu tagallalaryň netijesinde, türkmen okuwçylary we talyplary halkara bäsleşiklerde uly üstünlikleri gazanýarlar. Şu ýylyň noýabr aýynda Birleşen Arap Emirlikleriniň Dubaý şäherinde geçirilen “MEMORIAD – 2024 Bütindünýä Zehin Sportlary Olimpiadasy” we Indoneziýanyň Bali welaýatynda geçirilen Halkara ylym we oýlap tapyş taslama bäsleşiginiň ýeňijileri paýtagtymyzda sylaglandy.
 

MEMORIAD – 2024 Bütindünýä Zehin Sportlary Olimpiadasy.

2024-nji ýylyň 4 – 11-nji noýabrynda Dubaýda geçirilen bu abraýly halkara ýaryşa dünýäniň 60-dan gowrak döwletinden 150-den gowrak zehinli ýaşlar gatnaşdy. Türkmenistandan bu ýaryşa ilkinji gezek 17 okuwçy gatnaşyp, ýokary netijeleri gazandy:

Aşgabat şäheriniň 2-nji orta mekdebiniň okuwçysy Ogulmaral Altyýewa altyn medala mynasyp boldy.

Lebap welaýatynyň Türkmenabat şäherindäki 41-nji ýöriteleşdirilen mekdebiň okuwçysy Mekan Nurgeldiýew altyn medal gazandy.

Türkmenabat şäheriniň daşary ýurt diline ýöriteleşdirilen 29-njy mekdebiniň okuwçysy Aýgül Ýusupowa kümüş medala eýe boldy.

Halkara Ylym we Oýlap Tapyş Taslama Bäsleşigi (6th ISIF)

2024-nji ýylyň 5 – 10-njy noýabrynda Bali welaýatynda geçirilen VI Halkara taslama bäsleşiginde türkmen ýaşlary halkara derejesindäki ýokary sylaglara mynasyp boldular:

Aşgabat şäheriniň Saparmyrat Türkmenbaşy adyndaky ýöriteleşdirilen mekdep-internatynyň 11-nji synp okuwçysy Döwletmyrat Alymuhammedow altyn medal we aýratyn sylag gazandy.

Şol bir mekdebiň okuwçylary Kerimberdi Myratlyýew we Rahmanberdi Ödemyradow altyn medala eýe boldular.

12-nji synp okuwçysy Oguzhan Mergenow we 11-nji synp okuwçysy Muhammetguly Oraznepesow kümüş medal gazandylar.

Türkmenistanyň Oguzhan adyndaky Inžener-tehnologiýalar uniwersitetiniň 4-nji ýyl talyby Gowşut Akmyradow altyn medala mynasyp boldy.

S.A.Nyýazow adyndaky Türkmen oba hojalyk uniwersitetiniň 4-nji ýyl talyplary Ýaran Hudaýberdiýew we Kerim Meredow altyn medalyň eýeleri boldular.

Sylaglamak Dabarasy

Ýeňijileri sylaglamak dabarasy 2024-nji ýylyň 21-nji noýabrynda Türkmenistanyň Bilim ministrliginiň edara binasynda geçirildi. Çäräniň dowamynda Türkmenistanyň Bilim ministri çykyş edip, bäsleşiklerde üstün çykmagy başaran ýaşlary gutlady. Şeýle hem, ýaşlary ýurdumyzdaky döwrebap bilim mümkinçiliklerinden peýdalanyp, täze üstünlikleri gazanmaga çagyrdy. Ýeňijilere Hormat hatlary we gymmat bahaly sowgatlar gowşuryldy.

Gahryman Arkadagymyzyň hem-de Arkadagly Serdarymyzyň ýolbaşçylygynda alnyp barylýan syýasat ýaş nesliň bilim we sport ugurlarynda halkara derejesindäki üstünlikleri gazanmagyna giň ýol açýar.

Çeşme:
Türkmenistanyň Bilim ministrligi

Eneş DAŇATAROWA,
Türkmenistanyň Döwlet energetika
institutynyň 1-nji ýyl talyby.