Bütindünýä saglyk güni mynasybetli Tejen etrabynyň Garryçyrla Geňeşligindäki sport mekdebinde “Sport sagdynlygyň girewidir” ady bilen sportuň futbol görnüşi boýunça ýaryş geçirildi. Oňa etrabyň orta mekdeplerinde bilim alýan 10-11-nji synp okuwçylardan düzülen toparlar gatnaşdy.

Bäsleşigi Türkmenistanyň Kärdeşler arkalaşyklarynyň Ahal welaýatynyň Tejen etrap birleşmesi, Ylym we bilim işgärleriniň Kärdeşler arkalaşyklarynyň etrap Geňeşi hem-de Tejen etrap sport mekdebi bilelikde gurnadylar. Ýaryş örän gyzykly hem-de çekeleşikli geçdi. Täsirli geçen oýunlaryň her biri köpçülikde uly gyzyklanma döretdi. Oýunlaryň gidişinde etrabyň 8-nji we 1-nji mekdepleriniň futbolçy toparlary iň köp utuklary gazanyp, degişlilikde birinji hem-de ikinji orunlara mynasyp boldular. Ýaryşda 12-nji orta mekdebiniň futbol topary üçünji ýeri eýeledi. Bu gezekki sport bäsleşigi bu oýna ýaşlaryň höwesiniň uludygyny görkezdi.

Ýaryşda üstün çykan toparlaryň oýunçylaryna hem-de şol toparlaryň tälimçi mugallymlaryna Kärdeşler arkalaşyklarynyň etrap birleşmesiniň hem-de Ylym we bilim işgärleriniň etrap Geňeşiniň ýadygärlik sowgatlary dabaraly ýagdaýda gowşuryldy.

Gurbanmyrat JUMAÝEW,

Türkmenistanyň Kärdeşler arkalaşyklarynyň
Ahal welaýatynyň Tejen etrap
birleşmesiniň işgäri.