“Pähim – paýhas ummany Magtymguly Pyragy” ýylynda şanly Garaşsyzlygyň 33 ýyllygy mynasybetli Tejen etrabynyň Tejen şäherindäki sport mekdebinde “Sport sagdynlygyň girewidir” ady bilen sportuň woleýbol görnüşi boýunça bäsleşik geçirildi. Oňa etrabyň edara-kärhanalarynda zähmet çekýän zenanlaryň gatnaşmagynda, zenanlardan düzülen toparlaryň ençemesi gatnaşdy.

Bäsleşigi Türkmenistanyň Kärdeşler arkalaşyklarynyň Ahal welaýatynyň Tejen etrap birleşmesi, etrap häkimligi hem-de Tejen etrap sport we ýaşlar syýasaty bölümi bilelikde gurnadylar. Gelin-gyzlaryň ýaryşy örän gyzykly hem-de çekeleşikli geçdi. Täsirli geçen oýunlaryň her biri köpçülikde uly gyzyklanma döretdi. Oýunlaryň gidişinde etrabyň bilim bölüminiň we sport we ýaşlar syýasaty bölüminiň woleýbolçy gelin-gyzlary iň köp utuklary gazanyp, degişlilikde birinji hem-de ikinji orunlara mynasyp boldular. Ýaryşda üçünji ýeri Süleýman Demirel adyndaky Tejen pagta egirme fabriginiň gelin-gyzlary eýelediler. Bu gezekki woleýbol ýaryşy bu oýna ýaşlaryň höwesiniň uludygyny görkezdi.

Ýaryşda üstün çykan toparlaryň oýunçylaryna hem-de şol toparlaryň tälimçi mugallymlaryna Kärdeşler arkalaşyklarynyň etrap birleşmesiniň hem-de Ylym we bilim işgärleriniň etrap Geňeşiniň ýadygärlik sowgatlary dabaraly ýagdaýda gowşuryldy.

Gurbanmyrat Jumaýew,
Türkmenistanyň Kärdeşler arkalaşyklarynyň
Ahal welaýatynyň Tejen etrap birleşmesiniň işgäri.